Los sindicatos llamen a manifestase contra'l pieslle de Juliana

Representantes de los sindicatos CSI, CNT, Suatea, SF, CGT y USO fixeron güei un llamáu a la ciudadanía pa qu'acudan a la manifestación convocada pal próximu día 22, a les 19.30 hores.

La concentración va dir hasta la Plaza Mayor pa reclamar que'l sector naval nun suma y la reabertura l'astilleru Juliana que, según ellos, ta condenáu a un "inminente" pieslle por una nefasta xestión tanto política, como empresarial y sindical, con alusión a los firmantes del acuerdu cola Sociedá Estatal de Participaciones Industriales (SEPI).
  
Nesti sentíu, el sindicalista de la CSI Cándido González Carnero 'Cándido', en rueda de prensa na Casa Sindical, señaló que nun ve al cortu plazu "nengún tipu de solución" pa Juliana y criticó la desapaición de los astilleros xixoneses. "Ye llamentable que políticamente se los dexare morrer", apuntó. Ye más, acusó a los responsables políticos de llanzar "cantares de sirena", sobro la salida a los problemes de Juliana, cuando'l posible vendedor, Armón, yá anunció que quier un astilleru "vacíu de cargues" y sin trabayadores.
  
Coles mesmes, duldó de qu'a últimos d'esti mes puea tar resueltu'l conflictu puesto que'l procesu concursal nel que ta somorguiáu va ser llargu. A esto unió'l conflictu xudicial ente Alberto Barreras y Vulcano pola titularidá de Juliana, tovía pendiente de recursu, y el descensu de la cartera de trabayu nel mercáu actual.
  
Tamién apuntó qu'Armón adelantó tamién que nun tien nengún compromisu para colos 42 trabayadores de Naval Xixón a los que se-yos dixo que los diben a recolocar en Juliana. Cándidlo recordó que'l dineru que se metió en Naval foi una gran parte pa pagar les prexubilaciones y animó a abrir una investigación fiscal y xudicial, amás de refugar que se puea culpar d'estes cuestiones a los trabayadores y a los sindicatos que se movilizaron en contra del alcuerdu de pieslle.
  
Por too ello, dixo tener mieu de que "el meyor astilleru d'Europa de tipu mediu" vaya a desapaecer por una llamentable xestión y responsabilizó d'ello al Gobiernu español, asturianu y local. Al so xuiciu, detrás de too ello hai "un gran pelotazu urbanísticu" dao que los terrenos tanto de Naval Xixón como de Juliana son propiedá de Pymar, que nel so día yá pidiera la recalificación de los primeros.
  
Cándido calcó en que los sindicatos convocantes piden la reabertura de Juliana y que se tomen midíes urxentes, según que se dexe de siguir engañando. "Hai un riesgu inminente de que Juliana vaya a desapaecer", apuntó.
  
Pela so parte, Beatriz Quirós (Suatea) mostró'l so apoyu a la manifestación porque supón una defensa d'emplegu pa los mozos, que se ven conducíos a emigrar ante la falta d'oportunidaes na ciudá. De la mesma manera, Mónica Quintano (USU) indicó que se sumen a la movilización porque nun puen dexar que suman los astilleros y los puestos de trabayu.
  
Pel so llau, el representante de CNT Jorge Muñiz animó a demostrar el próximu día 22 una unidá y capacidá de movilización pa esixir a los poderes políticos qu'apuesten pola industria na ciudá. Coles mesmes, criticó les "falacies" que traten d'echar la culpa de la crisis a los trabayadores y adelantó que nun descarta qu'antes de final d'añu pueda convocase una güelga xeneral. Tamién José Luis Junquera (CGT) faló d'unidá y resaltó qu'anque nun suelen acudir a movilizaciones colectives, esta vez creyeron "conveniente" participar.