Morales ganaría les eleiciones rexonales

El movimientu al Socialismu (MAS), la formación liderada pol presidente bolivianu, Evo Morales, fadríase cola victoria na mayoría de los departamentos nes eleiciones rexonales d'ayeri.

Según les proyeiciones realizaes poles canales ATB y PAT -tovía nun hai resultaos oficiales- la oposición derechista algamaría caltener el control nos distritos de Santa Cruz (este), Beni (norte) y Tarija (sur).

Pela so parte, les candidatures del MAS ganaríen con relativa facilidá nel restu de departamentos del país (La Paz, Cochabamba, Oruro y Potosí), anque collecharíen peores resultaos nes municipales que se celebraron simultáneamente a les rexonales.    
  
Esto débese a que, según estos dos sondeos, los candidatos del MAS namás algamaríen la victoria en tres de les diez ciudaes más poblaes del país, collechando derrotes en La Paz y en Santa Cruz, capital del departamentu homónimu y urbe más poblada de Bolivia, colos sos 1,6 millones d'habitantes.
  
"A nivel departamental ta clara la hexemonía del MAS, y esto tien que ver en parte cola politización y el pesu del votu de les árees rurales, pero la oposición mostró que tovía pue llograr apoyu en seis ciudad capitales (de departamentu)", afirmó l'analista María Tersa Zegada a la cadena ATB. "Esto pon al país ante la necesidá de más negociación y concertación ente'l poder nacional del MAS y los poderes rexonales", añadió.
  
Morales, qu'entamó'l so segundu mandatu hai menos de tres meses y apoyó personalmente a los candidatos de la so formación nuna agotadora campaña, taría meditando emitir un mensaxe esta nueche al país, informaron fontes oficiales.
  
Según la mayoría de los analistes, les eleiciones rexonales y municipales malpenes modificaron el mapa políticu, polo que nun habría riesgu inmediatu pa los planes políticos indixenistes y socialistes de Morales.
  
Dende la so llegada al poder Morales opúnxose a l'ampliación de poderes de les rexones, reclamáu por algunos de los departamentos más importantes, como Santa Cruz, qu'amás de ser el más pobláu ye'l que tien la mayoría de les riqueces minerales del país.
  
Por ello Morales tuvo qu'acabar cediendo a estes demandes, pero fíxolo añadiendo matices indixenistes cola aprobación d'un nueva Constitución plurinacional aprobada nel 2009. Na nueva Carta Magna, amás, confirmábase la nacionalización de los hidrocarburos, otra de los grandes apuestes de Morales dende la so llegada al poder nel 2006.