Xurde Blanco Puente (Siero, 1952) ye lletráu del Serviciu Xurídicu del Principáu, secretariu del Aconceyamientu de Xuristes pol Asturianu y tamién académicu correspondiente.

¿Cómo se pue entender la sentencia del Xulgáu d’Uviéu, depués de l’Autu del Constitucional?
  
Pente medies de la lóxica xurídica nun tien entendimientu dalu. D’otres posibles esplicaciones hai milenta, entamando per prexuicios ideolóxicos, pero yo nun quiero facer hipótesis. Poro, lo que tenemos ye una sentencia xurídicamente ablucante y que va dar bien que dicir non sólo nos Tribunales, sinón nes Universidaes, pente los tratadistes del Drechu Constitucional y Alministrativu, na Abogacía y, mesmamente, ente la ciudadanía en xeneral a la que nun-y entra na cabeza que puedan pasar estes coses nun Estáu que se diz de drechu.
 
¿Cómo-y paeció que’l xuez entrara a valorar la so actitú, mesmamente a descalificalu?
  
Abúltame que vierti nuna sentencia espresiones innecesaries, improcedentes y manifiestamente ofensives, lo que l’artículu 418.6 de la Llei Orgánica del Poder Xudicial tipifica como falta grave. Amás, pretende sofitales na inorancia del conteníu del artículu 17 del Decretu 6/2004. La custión calificóse perbien na nota de prensa que sobro esti asuntu dio’l Conceyu por Otra Función Pública n’Asturies a la qu’empobino.
 
¿Cómo ye la situación d’anguaño, na qu’usté nun pue usar l’asturianu por si-y abren un espediente?
 
 Acordies coles resoluciones sobro l’asuntu, paez que nun puedo emplegar la mio llingua énte la Conseyería de la Presidencia, Xusticia ya Igualdá (¡xustamente nesa!), pero si énte les otres, acordies colo qu’afita una de les sentencies bendecida pel Tribunal Superior de Xusticia d’Asturies: “En efecto, la documental presentada por el demandante y cuya autenticidad no se ha negado de contrario evidencia que en el seno de la Administración autonómica no existe uniformidad alguna en el tratamiento de la cuestión relativa al uso de la lengua pues frente a la posición que aquí se enjuicia, dimanante de la Consejería de la Presidencia y que consiste en denegar la tramitación de solicitudes presentadas en asturiano requiriendo su formulación en castellano, se observa que en otras Consejerías mantienen una posición de mayor flexibilidad admitiendo la formalización de solicitudes en asturiano por sus funcionarios e incluso remitiéndoles los impresos en dicha lengua. Desde el punto de vista de la igualdad (artículo 14) e incluso de la seguridad jurídica (artículo 9), principios ambos establecidos en la constitución española y que los poderes públicos deben garantizar, no resulta una situación plausible por la confusión que genera”.Hasta ehí ta llegando la llocura represora desatada pel gobiernu llingüicida d’Areces.
 
¿Cuál va ser el siguiente procesu, va recurrir la sentencia?
  
Yá ta preparáu’l  recursu d’apellación a esperes de les suxerencies de los collaciones d’AXA, pa presentalu enantes del día 15 d’abril. Como n’AXA nun mos fiamos res de la xusticia provincializada, el recursu redautóse como si lu empobináremos direutamente al Tribunal Constitucional, con les seyes alegaciones de fondu sofitaes na Constitución. Llegaos ellí de xuru que s’igüen les coses pero, si nun fore asina, l’asuntu aporta al Tribunal Européu de los Drechos Humanos, de xuru.
 
¿Escora la xusticia asturiana haza les tesis más centralistes y a la contra de la personalidá propia del país?
  
Nun faigo xuicios de valor, pero dende l’Aconceyamientu de Xuristes pol Asturianu vien aconseyándose’l “desprovincializar la xusticia nos asuntos que cinquen a la llingua” y por algo sedrá. 
 
Usté criticó la falta d’asturianistes en Llanera, na concentración convocada por Fai. ¿Qué-y paez l’actual situación del movimientu de reivindicación llingüística?
  
Respeutu al estáu del movimientu de reivindicación llingüística abúltame qu’entama a rexenerase ente mocedá que paez resistise más qu’otres xeneraciones más vieyes a cayer nes redes del collaboracionismu y el clientelismu, que tan bien manexa el gobiernu d’Areces.
  
¿Algamaremos la oficialidá na próxima llexislatura si se reforma l’Estatutu?
 
La oficialidá de la llingua asturiana tenemos qu’arrincala nun mos la van regalar los partíos españolistes nin los asturianos descastraos que nellos medren. Asina que, per esi camín, d’oficialidá na viniente llexisllatura, nin traces.
 
¿Qué piensa del asturianismu políticu?, ¿con una representación nes instituciones de fuercies asturianistes/nacionalistes viviríamos estos casos de represión llingüística?
  
Pa min, anguaño, l’asturianismu políticamente organizáu tres cuatro o cinco sigles estremaes, lo qu’oxetivamente ta faciendo ye torgar que podamos tener presencia institucional y daqué pesu nel país. Paez paradóxicu pero ye asina. Si nun esistieren eses sigles, coles miseries y cainismos que foron atropando, sedría rellativamente fácil qu’ente una dolcena d’organizaciones cíviques montaren una candidatura asturianista con delles posibilidaes eleutorales pal 2011, pero como yá tan ellos ehí ocupando’l sitiu y nun son quien p’axuntase nin al rodiu d’un tonel, eso nun ye posible si nun se quier cayer nel error de montar otru xiringu más. Asina que nin faen nin dexen facer.
 
Usté ye una persona que polos últimos acontecimientos ta siendo abondo valorada dientro del movimientu asturianista, ¿pensó dalguna vegada presentase nuna llista asturianista?
 
 ¿Vusté albidra que coles coses que digo van quereme tanto como pa vinir a ufiertame un puestu nes llistes elleutorales?. Non, home, non. Nin lo van facer nin cunto con ello. Yo confórmome con dexar dalguna referencia de valir pa les xeneraciones moces na mio xera d’activista polos drechos llingüísticos del mio pueblu. Pero si dalgún día se presenta daqué serio a unes elleiciones y yo toi entá equí pa velo, voi echar la gabita no que pueda y faiga falta.
 
¿Qué-y paez la llabor de Consuelo Vega?, ¿Foi meyor Ramón d’Andrés?
 
 Pa poder facer comparances les coses tienen de tar nel mesmu planu y la tala Consuelo y Ramón d’Andrés nun lo tan porque la primera ye Direutora Xeneral (cargu políticu) y el segundu foi Xefe de Serviciu (puestu burocráticu, nomáu “a deu”, pero burocráticu). Por ello, les comparances tienen que facese, pel un llau, ente Consuelo Vega y Carlos Madera, que foi el Direutor Xeneral pal que trabayó Ramón d’Andrés, y, pel otru, ente ésti y Mª Antonia Pedregal que ye la Xefa de Serviciu, nomada “a deu”, d’anguañu.
  
Dempués d’eso hai que refiertar que la Direición Xeneral de Política Llingüística ta puesta pa executar la política del gobiernu que la noma, siendo asina que’l d’Areces, nun tien otra que nun seya la d’enterrar nun muséu a la llingua asturiana y, demientres, facer clientelismu políticu ente la ciudadanía asturianista. Pa lo primero emplégase la cibiella; pa lo segundo les sovenciones. Por eso’l xorrecer d’uno y otro ye pareyu: a más represión, más sovenciones. Lo d’esti añu –torgar a un funcionariu l’emplegu del asturianu fasta llegar al Tribunal Constitucional y tornar y vuelta a entamar y, al empar, enanchar les sovenciones pal emplegu de la llingua a 1 millón d’euros- ye exemplarizante.
 
¿Por qué quieren enterrar l’asturianu?. Bueno, tiénenlo dicho bien de vegaes: les cuentes qu’echen ye que tres la dignificación de la llingua vien el nacionalismu políticu y ellos, los ultranacionalistes españoles, nun tan pel llabor de carecer un nacionalismu más xunto col vascu, catalán y gallegu.
  
Asitiaes les coses, pa min la xera de Carlos Madera foi muncho menos dañible pal asturianu que la que ta faciendo Consuelo Vega, y el nomamientu de Ramón muncho más xustificáu -porque tien méritos reconocíos en materia llingüística- que’l de la so homónima María, ensin otru méritu –que yo conoza- que nun seya’l de ser cuñada d’Avelino Viejo, Síndicu Mayor de la Sindicatura de Cuentes del Principáu d’Asturies y, hai unos años, Conseyeru d’Economía o, lo que ye lo mesmo, altu xerifalte del réxime socialista español n’Asturies.   
 
¿Cómo ta l’asuntu del pidimientu a Política Llingüística d’información sobre’l documentu unviáu al Conseyu d’Europa?
  
Dempués de tirar d’ello “cantaron” que’l documentu nun lu unviaron al Conseyu d’Europa sinón a la Direición Xeneral de Cooperación Autonómica del Ministeriu de Política Territorial pa qu’esta, si-y da’l preste, lu mande al Conseyu d’Europa. Pero’l documentu nun lu quieren dar de nenguna manera, lo que quier dicir que daqué tan tapando. ¿Que cosa?. Albidro que’l collor rosa con que pintaríen el burru o mentires asemeyaes a les que yá soltaron hai dos años. Seya lo que seya va descubrise a nun tardar: en cuantes llegue, vía Madrid, al Conseyu d’Europa, tendrálu nes manes l’Aconceyamientu de Xuristes pol Asturianu porque n’Estrasburgu la xente ye más serio que nesta frontera con Marruecos, políticamente heriede del franquismu, y nun anda con estes cagarruties de colexu de monxes.
 
En 2011 el Conseyu d’Europa tien que facer otru informe sobre la situación de les llingües del Estáu, ¿qué pue dicir d’Asturies, onde nun se cumplió nenguna de les recomendaciones de 2008?
  
Vamos velo y si nun hai novedá cellebralo.
 
¿Podríemos dicir que’l nuesu Estatutu nun ye constitucional al nun declarar la oficialidá, mandáu de la Constitución pa les llingües d’España?
  
Pue afitase que l’Estatutu d’Autonomía d’Asturies nun cumple col mandáu constitucional (artículu 3.2) d’iguar la oficialidá de la llingua asturiana. Eso tenémoslo evidenciao dende l’Aconceyamientu de Xuristes pol Asturianu, con abondos ya incontestaos razonamientos nel “Dictamen Xurídicu sobre’l conflictu llingüísticu n‘Asturies” que ta pa vese na nuesa páxina web, nel llibrín que mos asoleyó l’Academia de la Llingua Asturiana o nes entregues que nel so día fizo’l selmanariu Les Noticies.
 
¿Cómo se pue entender l’asturianu seya una llingua pa la filoloxía y un dialeutu pa la xusticia?
 
Nun ye exautu ye’l que los xueces digan que l’asturianu ye un dialeutu. Non, nun dicen eso. Nel mentáu dictame d’AXA ya apurrimos una retafila sentencies de los Tribunales Constitucional, Supremu y Superior de Xusticia d’Asturies nes que califiquen al asturianu de llingua. Anguaño, que yo sepa, namás s’atreve a descalificalu como dialetu “El Pais” (día  8 de marzu de 2010) y tol mundiu persabe a qué progüeyos sirve esi diariu.