Día del Llibru Asturianu

Mieres va acoyer los actos de la Selmana de les Lletres

|

Mieres va ser el centru de l'actividá institucional de la Selmana de les Lletres, programada ente'l 3 y el 7 de mayu y dedicada a la recuperación de la figura y l'obra de Xosé Antonio García, Pin.

El programa d'actos, que se ta preparando dende la Conseyería de Cultura y Turismu, en collaboración del Conceyu de Mieres, incluye la celebración de dellos actos de calter institucional, la organización d'actividaes escolares o la publicación de dos obres preparaes espresamente pa la ocasión. 
 
Precisamente, el llunes día 3 de mayu, por cuenta de la inauguración de la XXXI Selmana de les Lletres, la Conseyera de Cultura y Turismu, Mercedes Álvarez, y l'alcalde de Mieres, Luis María García, van presidir la presentación d'estos dos llibros, titulaos “Poesía” y “Xosé Antonio García, un poeta nel fin de sieglu”.
 
La primer d'estes publicaciones –“Poesía”- recopila la obra poética más significativa del autor homenaxáu. Axunta los poemes publicaos a lo llargo de los años en distintes revistes, los dos llibros editaos en vida (Cuartetu de la criación y Alcordances d’un home muertu), y tamién un bon númberu de testos inéditos, que la familia facilitó atentamente a los dos estudiosos encargaos d'esta edición: l'escritor y críticu lliterariu José Luis Argüelles, responsable del estudiu introductorio; y la filóloga Laura Rodríguez Solís, que s'ocupó de la edición y notes.
 
Nel mesmu actu, va presentase'l llibru “Xosé Antonio García, un poeta nel fin de sieglu”, que va facilitar l'acercamientu del gran públicu a la vida y l'obra del escritor, ilustrando amás, con numberoses reseñar y fotografíes, l'Asturies de les últimes décades del sieglu XX. Esta publicación, coordinada pol escritor y direutor de la Casa de Cultura de Mieres, Ismael González Arias, va distribuyise de baldre'l día 7 de mayu nes 59 llibreríes que participen nel Día del Llibru Asturianu.
 
Los actos d'homenaxe a les lletres asturianes van asocedese nesta primer selmana de mayu por tol país, magar el conceyu de Mieres va alzase nel centru de l'actividá institucional. Amás del actu inaugural, la Casa de Cultura de Mieres va acoyer una esposición sobro la obra y dómina en que vivió Xosé Antonio García; visites escolares d'animación a la llectura; una reconocencia institucional del Conceyu de Mieres, col descubrimientu d'una placa n'homenaxe al autor; y l'actu escolar institucional de celebración de la Selmana de les Lletres Asturianes, entamáu pola Conseyería d'Educación y Ciencia del Principáu d'Asturies. Coles mesmes, la Xunta Xeneral del Principáu d'Asturies sumaráse un añu más a la Selmana con una llectura pública institucional de testos n'asturianu.
 
La Selmana de les Lletres Asturianes nació nel añu 1980 como un homenaxe públicu ya institucional a la lliteratura en llingua asturiana y foi configurándose como un acontecimientu cultural de gran importancia y vitalidá na Asturies actual.
 
Nes trenta ediciones anteriores, fueron oxetu d'homenaxe autores de gran relevancia como Antón de Marirreguera, Fernán Coronas, Xosefa Xovellanos, Xuan María Acebal o Enriqueta González Rubín, convertíos yá en clásicos de les nueses lletres.

Contador Estadistiques