Unidá Nacionalista Asturiana participó na Asamblea de l'ALE

UNA aprovechó l'Asamblea Xeneral de l'Alianza Llibre Europea, p'afitar les sos rellaciones coles organizaciones participantes y llevar a Europa la problemática asturiana.

La pasada fin de selmana la componente de la Xunta Executiva d'UNA, Yolanda González, xuntu col miembru de la Xunta Xeneral de la organización, Ernesto Avelino Suárez, participaron na Asamblea de la organización en Venecia
 
Esti ye'l segundu añu qu'una delegación d'UNA asiste al alcuentru d'esta organización qu'axunta a partíos políticos nacionalistes d'esquierdes y progresistes d'Europa, “una actividá que s'enmarca na política d'UNA destinada a conocer les esperiencies d'otros países, informar sobre la situación d'Asturies, y llevar la problemática del nuestru país a ámbitos de decisión onde UNA nun tien presencia, pero nos que se deciden les polítiques que nos afeuten”, indiquen dende la organización.
 
Según Yolanda González, componente de la Xunta Executiva de la organización, "tamos seguros que los esfuercios que tamos realizando nel ámbitu européu, van sirvir pa qu'Asturies vaya cuntando con un espaciu propiu na política comunitaria" porque “el futuru de les y los asturianos decídese cada vegada más n'Europa y nun podemos ser ayenos a esa realidá”.