6.000 estranxeros residen n'Asturies en situación irregular

|

Más de seis mil persones residen n'Asturies en situación irregular dedicaos a la economía non declarada, afeutando principalmente a les muyeres ocupaes nel serviciu domésticu.

Los datos presentólos güei en rueda prensa'l secretariu xeneral de UXT Asturies, Justo Rodríguez Braga, y la secretaria d'Igualdá y Política Social, Clara Casiano, de magar l'estudiu 'Situación de los Inmigrantes nel Mercáu Llaboral Asturianu'.

Según los datos que se recueyen nel informe, la población estranxera empadronada n'Asturies sube a 47.119 persones, lo que supón un 4,34 por cientu del total de la población y representa una de les tases de población inmigrante más baxes del país. De les mesmes, n'avientu de 2009, 40.794 atopábense en situación alministrativa regular.
  
Esencialmente, trátase de persones que vienen de Rumanía, Ecuador, Colombia, Brasil y Portugal y asiéntanse n'actividaes económiques nes que la crisis tuvo una mayor repercusión como la construcción, el sector industrial, l'agricultura, la pesca y el sector servicios. Asina, l'añu zarróse con un total de 5.171 estranxeros en paru, de les que 56 por cientu yeren homes y 44 por cientu muyeres.
  
En cuanto al perfil, son persones nueves, n'edá llaboral activa y que se concentra principalmente n'Uviéu y Xixón -un 60 por cientu del total- y Avilés.
  
Rodríguez Braga llamentó que determinaos sectores de la sociedá intenten culpabilizar a la población estranxera de les consecuencies d'una situación económica "de la qu'ellos fueron los primeros afectaos". El líder sindical pidió una actuación conxunta pa tratar les situaciones más graves d'esplotación llaboral y pa prevenir, detectar y escorrer los delitos contra los derechos llaborales.
  
"Tenemos que devolve-yos les prestaciones sociales a les que contribuyeron; nun ye un problema individual, sinón social", acabó.

Contador Estadistiques