EEUU pidió paralizar cuatro meses la construcción en Xerusalén

Ún de los pidimientos que fixo EEUU a Israel sobre'l procesu de paz foi que se paralice mientres cuatro meses la construcción nos asentamientos xudíos de Xerusalén Este.

A cambiu, según el diariu israelín 'Haaretz', Washington presionaría al presidente palestín, Mahmud Abbas, pa que mantenga conversaciones direutes col primer ministru hebréu, Benjamin Netanyahu, en llugar de les negociaciones indirectes a les qu'accedió l'Autoridá Palestina.
  
Una fuente oficial de Xerusalén afirmó que'l Gobiernu estadounidense pidió la paralización de la construcción en too Xerusalén Este, incluyíos los barrios xudíos de Neveh Yaakov, Llomba Francesa y Ramat Shlomo -nesti últimu va llevase a cabu'l polémicu plan qu'anunció Israel esti mes pa construyir ellí 1.600 viviendes-. La paralización duraría cuatro meses, el periodu de tiempu que la Lliga Árabe autorizó pa que se desarrolle'l diálogu indirectu ente Israel y l'Autoridá Palestina.
  
'Haaretz' esplicó qu'Estaos Uníos quier aprovechar la tensión que se xeneró nes sos relaciones col Estáu hebréu pa modificar les condiciones pal entamu de les conversaciones de paz, sustituyendo asina'l "diálogu d'aproximación" (indireutu) por unes negociaciones direutes.
  
Abbas negóse a entamar conversaciones col Gobiernu israelín mientres ésti nun acepte conxelar dafechu les actividaes de construcción nes colonies de Cixordania y de Xerusalén Este -que los palestinos quieren convertir na capital del so futuru Estáu--, pero Washington cree que si Netanyahu acepta una paralización de cuatro meses, mientres esi periodu ye posible un diálogu directu.
  
Nes xuntes que caltuvieron los siete ministros principales israelinos, la opinión xeneral ye que sería imposible anunciar públicamente una paralización de la construcción en Xerusalén Este, según el periódicu. Sicasí, cabría la posibilidá de llegar a un alcuerdu tácitu con Estaos Uníos sobre esti tema.
  
Acordies con esta idea, Tel Aviv dexaría claro a Washington que mientres los próximos cuatro meses nun va construyir masivamente nos asentamientos de Xerusalén Este nin va facer planes nesti sen, de forma que daría la impresión de qu'Israel ta cumpliendo les demandes d'Estaos Uníos y de los palestinos.
  
El pasáu avientu, Abbas plantegó nuna entrevista a 'Haaretz' que podríen convencelu d'aceptar una "paralización silenciosa" de la construcción na zona oriental de la ciudá y dixo que nuna conversación col ministru de Defensa israelí, Ehud Barak, propunxo que se dexara de construyir na zona mientres seis meses ensin anuncialo antes.
  
El diariu indicó'l pasáu llunes que'l Gobiernu estadounidense presentó más demandes al respeuto de Xerusalem Este, como que se vuelva a abrir ellí una oficina comercial palestina y que les autoridaes israelís dexen de destruyir viviendes palestines y d'espulsar a palestinos de les sos cases.