El Bloque denuncia la “deriva berlusconiana” de la RTPA

El Bloque por Asturies manifestó la so refuga a la deriva de la RTPA en cuanto a la so xestión y a los sos conteníos programáticos derivando hacia un modelu "berlusconianu".

En pallabres del voceru de la formación, Pablo Fernández, anguaño’l modelu de la televisión pública ta carauterizáu pola privatización de servicios y conteníos, xenerando emplegu precariu, con una información cuestionada dende estremaos ámbitos y cola ausencia d´espacios pal pensamientu críticu.
 
Al empar, Fernández dixo que nun ye de recibu que les informaciones tean cuestionaes, que se sustituyan espacios pal debate y el pensamientu críticu por retresmisiones deportives duplicaes d´otra cadena xeneralista y que los conteníos en llingua asturiana se marxinen permanentemente a pesar de la gran aceptación que tienen.
 
La formación diz tener claro qu´una televisión pública de calidá y al serviciu d’Asturies “nun pue guiase por criterios del ‘show business’ coles partíes presupuestaries del dineru públicu, nun pue renunciar a la producción propia en favor de les esternalizaciones, nun pue renunciar a la xeneración d'emplegu de calidá en favor del negociu priváu, la precariedá y la eventualidá llaboral de los y les trabayadores”.
 
El Bloque amosó la so solidaridá colos trabayadores de la RTPA, “que nun puen acabar convirtiéndose nes víctimes primeres d´un modelu ‘berlusconianu’, nin sufrir presiones intolerables col oxetivu de silenciar les sos crítiques constructives y afogar les sos xustes reivindicaciones”.
 
La formación nacionalista señaló qu’apuesta por una RTPA pública, asturiana, plural, sostenible y de calidá. “Pa eso ye imprescindible acabar cola precariedá llaboral, comprometese col desarrollu d´un sector audiovisual asturianu y garantizar la participación de los y les trabayadores, respetando los sos drechos”, apuntó pa finar.