Al Bashir amenaza con suspender el referendu de Sur de Sudán

El presidente de Sudán amenazó con suspender el referendu d'independencia de la provincia de Sur de Sudán,  si los rebeldes niéguense a tomar parte nes eleiciones d'abril.

"Si'l Movimientu de Lliberación de Sudán (SPLM) niégase a celebrar les eleiciones nós vamos neganos a celebrar el referendu", dixo Omar Al Bashir mientres un discursu de campaña en Jartum.
  
El próximu 11 de abril Sudán va celebrar eleiciones presidenciales y lexislatives multipartidistes la primer vegada en 24 años. Sicasí, los partíos opositores, ente ellos el SPLM, denunciaron que los comicios nun van ser nin xustos nin llibres, polo que podríen decidir negase a participar nellos como midida de protesta.
    
L'alcuerdu de paz del 2005 ente'l SPLM y el Partíu del Congresu Nacional (NCP) d'A'l Bashir, col que se punxo fin a más de dos décaes de conflictu na rexón de Sur de Sudán, establez la celebración d'un referéndu d'independencia pal 2011.
  
"Nun vamos aceptar nin siquier un día de retrasu nes eleiciones", señaló Al Bashir en declaraciones recoyíes pola cadena Al Yazira. El presidente sudanés amenazó la selmana pasada con espulsar a los observadores internacionales si éstos solicitaben retardar los comicios.
  
L'únicu organismu internacional con permisu pa supervisar la votación, el Centru Carter, espresó la necesidá de retrasar de brevemente les eleiciones por cuenta de problemes loxísticos, ente ellos l'ausencia de munchos ciudadanos nel censu electoral. La oposición, pela so parte, quier que s'aplacen hasta'l próximu mes de payares.