Yugoslavia yá nun esiste... n’internet

|

Yugoslavia dexó güei al mediudía d’esistir n'internet al finar el periodu de transición ente’l dominiu ‘.yu’ y los nuevos ‘.rs’ pa Serbia y ‘.me’ pa Montenegru, habilitaos pol ICANN.

L'indicativu de Yugoslavia tuvo catorce años de vida, depués de que l'ICANN, entidá con potestá sobre los dominios web, decidiera la desapaición del ‘.yu’ tres que’l país dexara d’esistir en 2003.
 
El dominiu ‘.rs’ taba disponible dende va dos años, finando’l periodu de transición el 30 de setiembre de 2009, pero pidiendo les autoridaes servies un periodu de gracia de seis meses, yá qu’entá quedaben unes 4.000 páxines web qu'usaben ‘.yu’.
 
Yugoslavia foi'l nome d'un estáu européu allugáu nos Balcanes occidentales ente 1918 y 2003. L'antigua Federación Socialista de Yugoslavia, que se desintegró na década pasada, en delles casos tres sangrines guerres, taba formada por Eslovenia, Croacia, Bosnia-Herzegovina, Serbia, Montenegru y Macedonia.
 
Serbia y Montenegru formaron la República Federal de Yugoslavia ente 1992 a 2003, añu nel que'l país pasó a llamase Serbia y Montenegru, hasta qu'en 2006 Montenegru proclamó la so independencia tres un referendu.

Contador Estadistiques