UXT propón un documentu conxuntu en defensa de la llinia Lada-Velilla

El secretariu d'UXT dixo que preparen un documentu en defensa de Lada-Velilla qu'espera firme CC.OO y FADE. Amás, afirmó qu’El Musel permite'l desarrollu d'Asturies.

Según Justo Rodríguez Braga, ye importante qu'haya un documentu conxuntu sobre la necesidá de les llinies d'evacuación enerxética pal desarrollu d'Asturies, pa ver si asina se pue sacar alantre'l proyectu.
  
Braga, en respuesta a los periodistes enantes de la so visita a les obres d'ampliación d'El Musel, calcó en que nun ye concebible un desarrollu potente de d’Asturies si nun se sigue realmente desarrollando esi sector enerxéticu que nel so día foi importante p'Asturies. Coles mesmes, indicó que la evacuación forma parte d'esi texíu en malla que si nun se pon remediu puede traer problemes.
  
Nesti sen, apuntó que nun ye la primer vez que se produciría n'Asturies un problema d'esti tipu y aludió al apagón d'instalaciones industriales importantes mientres dos hores hai unos diez años. Al so xuiciu, eso pue repitise en cualquier momentu. "Nun ye facer la llamada de que vien el llobu, sinón que ye constatar una realidá", dixo.
 
El Musel, modelu productivu y económicu
 
Xusto Rodríguez Braga destacó la importancia de les obres d'ampliación d'El Musel pal desarrollu d'Asturies, al potenciar la industria y l'enerxía. Coles mesmes, resaltó la xeneración d'emplegu mientres les obres, nes que se dio trabayu a polo menos 2.000 o 3.000 persones nestos trés años, y los que se puen llegar a crear cuando tea a plenu rendimientu.
  
Asina lo dixo Braga, acompañáu del presidente de l'Autoridá Portuaria de Xixón, Fernando Menéndez Rexach, enantes de la visita d'unos 40 afiliaos d'UXT a les obres d'ampliación. Pal representante sindical, el puertu xixonés representa, nesti contestu de crisis, un "activu" d'esi modelu productivu y de desarrollu que dende UXT se vien demandando.
  
 Tamién aludió al aumentu de los tráficos que s'espera nel Principáu y vinculólu amás a la parte d'Actividaes Loxístiques y Industriales d'Asturies (Zalia), de la que se faló'l llunes na xunta del Aceba al respecto de la inversión importante nos accesos a ésta.
  
A too ello unió'l polu enerxéticu previstu nel que, tovía siendo ciertu que queden un pocu "aparcaos" los ciclos combinaos nesti momentu, la regasificadora va ser como'l puntu d'entamu de toles infraestructures que se van a crear n'El Musel. "Va ser un buen día", repostió.
  
Braga tamién señaló que yá tenía ganes de poder asistir a la inauguración del superpuertu a últimos d'esti añu. A esti respecto, Rexach confirmó que la previsión ye qu'a últimos d'añu acaben les obres, una vez que-yos concedió la prórroga la UE.