Comerciantes y hosteleros del Caudal piden más titulaciones en Barreo

La Unión de Comerciantes y Hosteleros del Caudal informó de la so integración nel movimientu que reivindica la implantación de nueves titulaciones nel Campus de Barreo, en Mieres.

Acordies con esta organización, l'equipamientu universitariu mierense "cumple tolos requisitos que se puen esixir a un campus pa recibir titulaciones" puesto que se trata, dixeron, d'una instalación "nueva, preparada, correcta a les nueves tecnoloxíes y nun entornu de comunicaciones estraordinariu".
 
Por too ello, según el manifiestu lleíu pola presidente de la Unión de Comerciantes y Hosteleros, Dolores Olavarrieta, "queremos que se mos vea como primer opción pa recibir titulaciones". "Nun queremos un edificiu muertu, queremos mocedá, vida y pa ello nun queremos restos de naide".

Esta entidá desvinculóse de "cualquier grupu políticu", puesto que'l so oxetivu ye reclamar nuevos conteníos pa un campus. Algo que supondría buenes noticies pal so sector, dao que mos devolveríen la mocedá y tolo qu'ello supón" pa los comercios, les hosteleríes y, hasta pal mundu inmobiliariu. Dende la Unión de Comerciantes dexóse claro, poro, que "el campus de Mieres esiste" y pidióse que se lu tengan en cuenta de cara a los nuevos títulos.