La nueva rede Independentistak llama a sumase al so Aberri Eguna

El representante d'Independentistak, Txutxi Ariznabarreta, llamó a los independentistas a sumase al Aberri Eguna entamáu por esta iniciativa pal próximu domingu n'Irún y Hendaia.

Amás, afirmó que difícilmente se pue plantegar un ataque a una iniciativa d'esti tipu dende "claves democrátiques" en referencia a la posibilidá de que puea haber riesgu d'illegalización.
  
Nuna entrevista concedida a Info7 Irratia, recoyida por Europa Press, Ariznabarreta afirmó que yá se sumaron casi 7.000 persones a la convocatoria del primer actu que va celebrar la Rede Independentista Vasca con motivu del Aberri Eguna el próximu 4 d'abril nes poblaciones d'Irún y Hendaia.
  
"Lo importante ye que vengan munches persones, tampoco buscemos que se sumen sigles", afirmó, en referencia al fechu de que, hasta agora, mostraren la so incorporación EA y la esquierda abertzale.
  
Nesti sen, manifestó la so esperanza de qu'a esti actu se sumen "tolos independentistes" de tol abanicu de partíos abertzales y soberanistes. "Esti Aberri Eguna tien de marcar un puntu d'inflexón na política vasca", señaló.
  
Preguntáu por si son conscientes de qu'Independentistak tamién pue tar "nel puntu de mira del Gobiernu" pa una illegalización, Txutxi Arizbarreta afirmó que "eso ye inevitable nesti país, pero ún nun puede convertise n'esclavu d'esi mieu".
  
"Lóxicamente, cuando se crea cualquier forma organizativa nesti país que plantega la independencia, pol fechu de qu'eso confronta directamente coles estratexes estatales, entós, darréu, dende l'Estáu pónense en marcha ataques directos contra cualquier tipu d'iniciativa d'esti estilu", manifestó.
  
Ariznabarreta afirmó que, "pel momentu, paez que nun dicen nada nin los d'equí nin los de Madrid". "Nós vamos siguir trabayando, dexamos claro dende'l primer momentu qu'esto ye una rede de persones que quieren trabayar en claves democrátiques, en práctica democrática, na confrontación política y de les idees. Y difícilmente pue plantegase un ataque a una iniciativa d'esti tipu dende les claves democrátiques. Pero equí yá sabemos lo qu'hai", indicó.
 
Amás, afirmó qu'Independentistak, tres l'Aberri Eguna, va entamar "la so andadura", y sorrayó que "nun tien nada que ver col polu soberanista", porque esti últimu respondería más a plantegamientos del "xuegu ente partíos políticos pa ciertos oxetivos tácticos".
  
"Lo nueso ye una rede de persones independentistes y lo que queremos ye qu'esos independentistes vayan tornando n'activistes pola independencia d'Euskal Herria, con un plantegamientu estratéxicu", aseveró.
  
Por ello, a partir del Aberri Eguna, va crease "masa crítica bastante pa poder empezar ente toos a definir esti movimientu y a caracterizalu".