Estudiantes preparen movilizaciones contra Conceyu européu de ministros

Estudiantes anti Bolonia tán preparando un "recibimientu especial" a la xunta informal de ministros d'Educación de la Unión Europea convocaos pal próximu día 13 d'abril en Madrid.

La Plataforma Bolonia Fucking Up Group lleva selmanes axuntándose pa entamar, per un sitiu, la ContraCumbre que va tener llugar del 8 al 14 d'abril en Madrid, con una 'bicicletada' pel centru de Madrid "pa protestar y molestar a los ministros europeos, responsables de que la Educación se destruya día ente día, vendiéndola por unes migayes".
  
"A Puerta zarrada y ensin contar cola comunidá educativa, nin cola sociedá polo xeneral, xúntense de nuevu pa pensar cómo rentabilizar tovía más la educación", esclamen na so convocatoria, fixada pa les 20 hores y col puntu d'alcuentru na plaza de Cibeles.
  
Un día enantes, el 12 d'abril, convocaron, amás, una manifestación ente Atocha y el Ministeriu d'Educación baxo'l lema 'La Educación nun va pagar La Europa del Capital. Que nun decidan por ti, contra'l Conceyu de Ministros d'Educación Europeos'. Nesti sen, faen un llamáu a manifestase a toa persona, colectivu, asociación, AMPA, partíu, sindicatu, "que tea en contra de que la Educación s'utilice como mercadería".