Día del Llibru Asturianu

COFPA diz que quixeron desprestixar a Blanco cola sentencia

|

El Conceyu por Otra Función Pública camienta que la sentencia que-y ñega a Xurde Blanco pidir permisos n’asturianu, “tien más enfotu en desprestixar qu’en facer xusticia”.

Pal COFPA, la sentencia del Xulgáu de lo Contencioso-Alministrativo númberu 3 d’Uviéu ye una xuntanza d’afirmaciones y razonamientos restorcíos colos que’l xuez paez poner más enfotu en desprestixar al funcionariu qu’en resolver en xusticia, “dándo-y la vuelta, colo de dientro pa fuera, al xacíu xurídicu”.
 
Afirmen que la sentencia ye un xuiciu de valor inalmisible, onde’l maxistráu imputa a Xurde Blanco una conducta illícita “cuando lo que fixo ye xustamente cumplir dafechu cola llegalidá pidiendo’l permisu correspondiente”.
 
“Tala ‘perversa actitú’ xustifícala’l Maxistráu na afirmación de que l’ausencia por enfermedá hasta tres díes nun requier solicitú de permisu sinón xustificación a posteriori del tratamientu médicu, lo que, cenciellamente, ye mentira, acordies colo qu'establez el réxime de permisos de los funcionarios”, afirmen dende’l COFPA.
 
Pa la organización, que’l xuez “impute inxustamente” a Xurde Blanco de menoscabar el principiu d’autoridá “por mor de si cumplió o non con una instrucción que nun s’espublizó en nengún sitiu”. Dalgo que califiquen d’absurdu, yá que nada tenía que ver col alderique del pleitu, “que yera sobre’l drechu d’un funcionariu a emplegar la llingua asturiana col sofitu de la llei y en condiciones d’igualdá colos demás trabayadores”.
 
Dende’l Conceyu por Otra Función Pública, camienten que’l maxistráu debió de reconocer el derechu d’emplegar l’asturianu “en cumplimientu bonal del Autu del Tribunal Constitucional de 25 de febreru”.
 
Sicasí, afirmen que’l Xuez dedícase a acusar al funcionariu con imputaciones pa les que nun-y dio ocasión de defendese, “conducta que bien pue ser calificada como una infracción grave, de la que ye autor el Xuez, y que ta tipificada nel artículu 418.6 de la Llei Orgánica del Poder Xudicial,  que sanciona l’emplegu nes resoluciones xudiciales d’espresiones innecesaries o improcedentes, estravagantes o claramente ofensives o irrespetuoses dende’l puntu de vista del razonamientu xurídicu”.
 
Pa finar, califiquen de grotescu’l que s’acuse de perxudicar el furrulamientu del Serviciu Xurídicu del Principáu d’Asturies a ún de los dos (de diecisiete) únicos Lletraos d’esi muérganu que s’atopa en situación regular porque llegó al puestu per concursu de méritos, “cuando’l Xefe del Serviciu, que tanto celebra la sentencia, y tolos demás Lletraos y Lletraes, tan ellí con nomamientos a ‘deu’ y en comisiones de serviciu irregulares per plazu superior al máximu llegalmente establecíu”.

Contador Estadistiques