Marcelino Sánchez nuevu presidente del Conceyu de la Mocedá

El nuevu presidente, Marcelino Sánchez, manifestó que’l so equipu “va poner l'acentu na defensa de los derechos de la mocedá trabayadora nesti momentu de crisis económica”.

La XXXIX Asamblea Xeneral del Conseyu de la Mocedá del Principáu d'Asturies, celebrada güei nel salón d'actos del Edificiu Alministrativu del Principáu, escoyó a la nueva Comisión Permanente que va dirixir esti organismu mientres los próximos dos años. La candidatura, integrada por representantes del Conseyu de la Mocedá de Llaviana, Cruz Roja, Mocedaes Socialistes, Nueves Xeneraciones del PP, y les mocedaes d'IU, CCOO y UXT, llogró'l 77% de los votos.
 
Amás d'escoyer a la so nueva executiva, que va facer de la vivienda y la participación xuvenil dos de les sos grandes exes d'actuación, l'Asamblea aprobó cinco resoluciones. La primer d'elles esixe al Gobiernu asturianu tomar midíes pa la reactivación económica del occidente d’Asturies. La segunda y la tercera esixen al Principáu la defensa del sistema públicu de pensiones y un especial curiáu por que la próxima reforma llaboral evite que se dean situaciones nes que les persones nueves trabayen ensin cotizar.
 
Una cuarta resolución alcuerda l'adhesión del Conseyu de la Mocedá del Principáu d'Asturies a la Plataforma d'Apoyu a Pepe El Ferreiro. La quinta resolución aprobada reclama un emplegu estable y de calidá pa los trabayadores de la TPA. La sesta y última, compromete al CMPA na defensa del usu del software llibre na Alministración.
 
L'informe de mandatu de la Comisión Permanente saliente llogró'l sofitu unánime de los delegaos de l'Asamblea. En dichu documentu recordaba la constante negativa del presidente del Principáu a aconceyase colos representantes del Conseyu de la Mocedá, y que'l Conseyu Rector del Institutu Asturianu de la Mocedá, órganu coordinador de les polítiques xuveniles del gobiernu, sigue ensin aconceyase dende 2007.
 
Na clausura participaron la vicepresidenta de la Xunta xeneral del Principáu, Diana Camafeita, la diputada popular Cristina Coto de la Mata, la diputada socialista Greta Cortina, y el direutor del Institutu Asturianu de la Mocedá, Guillermo Martínez.