La Coḷḷá Propinde presenta 'A teyavana' en Ḷḷena

El grupu asturianu de folk-fusión, La Coḷḷá Propinde, presenta mañana, domingu 28 de Marzu, el so tercer trabayu discográficu, “A Teyavana” nel Teatru Vital Aza de La Pola Ḷḷena.

El grupu va presentar a partir de les 19.30 hores, nun conciertu especial y de baldre, los temes d'esti “A teyavana” qu'acaba de salir al mercáu col sellu “Algamar Producciones”. Un discu con 12 cantares onde se combinen los temes de reelaboración tradicional y los de composición propia del grupu. Amás, nésta ocasión, cunta cola collaboración d'Esther Fonseca, que pon voz al cantar “2417”.
 
“A teyavana” foi grabada nos estudios TUTU ente mayu y setiembre, cola producción de Sergio Rodríguez y Ánxel González. Ente la biografía de La Coḷḷá Propinde, destaca el premiu al meyor cantar n'asturianu'l añu 2003 por “l’emigrante”. A lo llargo del añu 2009 fueron banda sonora de la serie d'Antena3 “Doctor Mateo”.