El Bloque quier que se prohiba un actu "d'estrema derecha"

El Bloque por Asturies pidió a la Delegación del Gobiernu español n’Asturies que tome les midíes afayadices contra un actu "del grupu d’estrema derecha Frente Nacional".

Esti sábadu día 27 de marzu la ‘Asociación Cultural Reconquista’, “que ye una tapadera del partíu fascista Frente Nacional”, tien convocáu un tornéu de fútbol y una comida que va rematar con un actu políticu “onde esti grupu va facer lo único que sabe, apoloxía del racismu, la xenofobia y la superioridá de la raza blanca”.
 
“Esti partíu carauterízase por gastar un discursu antisemita, de criminalizar a la inmigración, homófobu, en contra de los derechos llingüísticos de les comunidaes con llingua propia, en contra del estáu de les autonomíes, machista y belicista”, indiquen dende la organización.
 
Según el Bloque, pue vese nos sos documentos políticos l’odiu que tienen contra l’islán, contra los emigrantes, los homosexuales y les muyeres. “Ente tanta chifladura y odiu lleguen a dicir que regalar armes y xuguetes bélicos a los neños y les neñes ye bono; y tán en contra de que la xente pueda adoptar criatures que nun seyan españoles porque, según esta xente, ye malo y ayuda a la contaminación cultural”, apunten.
 
Poro, el Bloque por Asturies pide a Trevín que nun consienta estos actos y al Conceyu de Castrillón que nun autorice en nengún espaciu públicu esta “demostración d’odiu contra los inmigrantes, les muyeres, los homosexuales y la mayoría de la población que nun piensa d’esta manera”.