Una selmana; mil rexistros

Depués de dellos meses en beta privada, Ximiélga.me abrióse al públicu fai una selmana. Siete díes depués el resultáu nun pue ser más satisfactoriu; más de mil persones rexistraes.

La primer rede social n’asturianu entamó en beta privada’l 18 d’avientu de 2009, siendo los sos primeros usuarios los blogueros que participaron na votación del meyor blogue. Nel alcuentru ‘Sidra & Blogues’ de Ciañu, celebráu en febreru, dalgún de los potentes que participaron nes xornaes faló del proyeutu de Ximiélga.me como una páxina llamada a convertise nel puntu de referencia del asturianismu al traviés de la rede, onde los usuarios interacciones ente ellos y pudieren espardese per otros filos.
 
Con más de mil persones rexistraes, y xubiendo, paez qu’esi deséu nun va ser difícil de cumplir, anque pel momentu les persones que yá cuntaben con un perfil enantes d’abrise la beta pública, los blogueros, siguen siendo los que más participen y animen la páxina, a la espera de que los nuevos usuarios entamen a avezase a la páxina y los sos preseos.
 
Preseos como’l serviciu de microbloging (nomáu "El telégrafu"), un sistema pa guardar enllaces na cuenta del usuariu (como los marcadores d'un restolador pero online), una especie de "muru" asemeyáu al de Facebook y tamién un sistema de mensaxería interna.
 
La páxina quier ser un complementu a Facebook, Tuenti y otres redes sociales asemeyaes, teniendo como novedá ufrir los sos servicios n’asturianu como llingua principal, anque los usuarios tamién puen escoyer l’inglés o’l castellán.