Skama prepara’l so tercer discu

Skama la Rede ta rematando los doce cantares que va enxertar nel so nuevu discu. La banda va ufrir el so conciertu númberu 100, el próximu 24 d’abril nel Conciertu pola Oficialidá.

"Sarxentu Retonda", "SOS. Fame en Tapia", "Na nuestra realidá", "Nunca vais poder", "Nieva sobre moyao", "Sí lo diz mio güela", "Albo-rada impopular", "Yes mongol", "Condenáu", "Ye too mentira", "La resaca yá vendrá" y "Pa bien o pa mal" son los títulos de les canciones nueves que'l grupu va grabar a finales d'abril nos Estudios Tutu de Corvera con Sergio Rodríguez. El discu va ser espublizáu por Discos L'Aguañaz.
 
Xunto con esti trabayu nuevu, que tovía nun hai nome decidíu, el grupu tamién ta preparando nuevu material pa los sos seguidores, camisetes, en concreto. Dende la espublización de "La Nuesa Hestoria" nel 2005, Skama la Rede nun sacara productos propios de merchandising.
 
Al tiempu que van entrar nel estudiu, tamién va empezar la so xira del 2010 que va llevar el nome de "Tour Yes Mongol" y de la que se conocen dalgunes feches anque la banda sigue negociando conciertos n'Asturies (Derrame, Foguera de Caravia, Pueyes Rock), Galicia, Castiella, País Vascu y Cantabria.