El Llano acueye'l domingu'l II Campeonatu d'Asturies de Liriu

El colexu d'El Llano (Xixón) va acoyer esti próximu domingu la primer parte del II Campeonatu d'Asturies de palu o liriu, qu'empobina'l Conceyu Nacional del Liriu.

Esti xuegu ye una modalidá tradicional consistente en llevantar un palu (el 'liriu') del suelu con un golpe con otru palu de mayor llargor (la 'machorra'), pa darréu cutilu otra vez y llanzalu a la mayor distancia posible.
 
La competición va empezar de magar les 11.00 hores. Nesti casu, va prauticase "una de les sos numberoses variantes, na que la meta ye introducir el 'liriu' nun castru circular".
  
Coles actividaes del domingu, entamaes pol club Espor d'Asturies, ponse en marcha'l segundu Campeonatu d'Asturies, que cunta con una participación de cinco equipos (Camaretá del Liriu de Noreña, Sidronos, Espor d'Asturies, Asturliriu y Quirinal) y el I Campeonatu d'Asturies de Liriu Individual, gracies al I Abiertu de Liriu d'El Llano, d'accesu llibre pa tol que quiera participar.