El Conceyal de Cultura d'Avilés y la responsable de la Estaya de Llingua presentaron dos campañes de normalización, una orientada a tolos ciudadanos en xeneral y otra a los escolinos.

La primera, titulada ‘¿Tu que faes pa cuidar el mundu?: reduz, reutiliza, recicla’, ta dirixida a tolos ciudadanos. La campaña consiste nel repartu de 700 bolses plegables y reutilizables por comercios y asociaciones de vecinos y quier, amás de promocionar l’asturianu, afalar el reciclaxe.
 
Mientres que la segunda, ‘El mio primer vocabulariu, consiste nel repartu de seis modelos de carteles diferentes pelos colexos, institutos, biblioteques y otros centros rellacionaos cola población infantil d’Avilés.
 
Los cartelos son obra del diseñador gráficu Sidoro Villa Costales y tienen seis temes diferentes; la ribera (flora y fauna), les estaciones del añu, el cuerpu humanu (órganos), el vistíu, la casería y el monte (flora y fauna).
 
Esta última campaña quier que los escolinos entamen a prauticar col vocabulariu n’asturianu, en pallabres del Conceyal de Cultura, Román Álvarez, qu’afirmó que la iniciativa yera una manera prestosa pa que los centros trabayen n’asturianu d’un xeitu normal.
 
Amás, el Conceyal, que faló n’asturianu na rueda de prensa, felicitó a la Estaya de la Llingua d’Avilés por tol trabayu y comentó qu’esta campaña tenía un envís pedagóxicu, “que se complementará coles próximes Xuntes d’Escolinos”.
 
Montse Machicado, reponsable del serviciu de normalización local, faló del ésitu d’esta última campaña namás presentala, “nun entamu diba ser namás pa los colexos d’infantil, pero a los institutos presto-yos la iniciativa y pidiéronnos cartelos”.
 
Les dos iniciatives tán empobinaes a comuña con otros centros de la Rede de Normalización nos Conceyos, nesti casu Siero, Ḷḷena, Mieres, Samartín, Carreño, Gozón y Corvera.