Europa concede 12 millones d’euros pal cine en catalán

La Comisión Europea (CE) aprobó un plan pa subvencionar a la Generalitat con 12 millones d'euros pal doblaxe y la subtitulación de películes en catalán.

La finalidá del plan, empobináu pol gobiernu español, ye promover l'usu del catalán na industria del cine. Les ayudes van dir concediéndose a la Generalitat hasta’l 31 d’avientu de 2015.
 
Según les autoridaes españoles, cada añu dóblense al español unes 800 películes, mientres qu’en catalán namás se dobla una ventena y subtitulen ente diez y quince, yá qu’hai poques distribuidores qu’inviertan dineru cuando yá hai una copia en castellán.
 
El plan sigue la normativa de la Unión que concede ayudes públiques pa oxetivos culturales, ente ellos la promoción del multilingüismu y la diversidá cultural.