Xerusalén aprueba la construcción de 20 viviendes nel este de la ciudá

El Conceyu de Xerusalén aceptó'l pidimientu que presentara un grupu de colonos israelinos pa construyir 20 apartamentos nel este de la ciudá al par d'un polémicu hotel.

L'Hotel Pastor, asitiáu nel barriu de Sheij Jarrá, mercáralu en 1985 el magnate estaounidense xudíu Irving Moskowitz por un millón de dólares. Agora Moskowitz pretende dexar intactu l'hotel pero valtar un edificiu cercanu y construyir nel so llugar viviendes pa xudíos israelinos. Amás, va construyise un aparcamientu de tres plantes y una cai d'accesu.
  
El conseyu de planificación local aprobó previamente'l plan el pasáu mes de xunetu, una acción que nun gustó a Estaos Uníos y a Reinu Uníu, que pidieron a les autoridaes israelines que lu atayaren. El xueves pasáu, el conseyu dio la so aprobación definitiva, polo que les obres puen empezar yá.
  
El primer ministru israelín, Benjamin Netanyahu, aconceyó ayeri, martes, en Washington col presidente estadounidense, Barack Obama, dempués del malestar xeneráu n'Estaos Uníos pol anunciu per parte d'Israel de la futura construcción de 1.660 viviendes pa xudíos en Xerusalén Este, un territoriu que los palestinos quieren tornar na capital del so futuru Estáu.
  
Anque Netanyahu alloñóse d'aquella decisión anunciada pol Ministeriu del Interior, repitió enantes y mientres el viaxe qu'Israel tien drechu a construyir en Xerusalén Este. El so oxetivu yera restaurar la confianza nes relaciones billaterales con Estaos Uníos, les cuales, aseguró, "nun se deberíen poner en peligru poles diferencies nel tema de Xerusalem".
  
Rudeina, que calificó de "ilexítimos" los asentamientos israelinos de Xerusalén Este, sorrayó que nun va haber paz nin estabilidá ensin un Xerusalén palestín. La política israelina nesti aspeutu constitúi, al so xuiciu, un intentu de "atayar los esfuerzos que ta faciendo'l Cuartetu (pa Oriente Próximu) y, en particular, el Gobiernu americanu" p'algamar una paz duradera na zona.
  
El voceru reconoció que les declaraciones que ficieron recientemente Cuartetu y Washington son "alentadoras" pero añadió qu'amás tienen d'adoptar "una postura práctica y resuelta pa llograr la paz".