Los funcionarios nun tienen drechu a usar l'asturianu

El Xulgáu de lo Contencioso-Alministrativu nº3 d'Uviéu vien de tornar el recursu presentáu por Xurde Blanco. El maxistráu diz que l’actitú del funcionariu “define la mala fe procesal”.

El Xulgáu dictó sentencia favorable al Gobiernu asturianu respeutu al contenciosu plantegáu pol funcionariu del Cuerpu Superior d'Alministradores del Principáu d'Asturies, Xurde Blanco Puente, en rellación al usu del asturianu na Alministración.
 
La sentencia diz que’l miembru del Aconceyamientu de Xuristes pol Asturianu "nun tien drechu a rellacionase cola Alministración del Principáu n’asturianu, cuando actúa na so condición de funcionariu" y que'l Principáu en nengún momentu dio-y un tratu desigual.
 
Nel fallu recuéyese tamién una valoración sobre la conducta del recurrente que, según el Xulgáu "apaez tiñíu por notes que definen la mala fe procesal" y "paez movese col únicu interés d'interferir nel bon funcionamientu de l'Alministración, pa la qu'empresta los sos servicios, y la que tien d'atender, con llealtá y probedá". El maxistráu puntualiza amás que l'actitú del funcionariu, “inorando una instrucción de los sos superiores”, tendría d'haber dao llugar a una "correición disciplinaria".
 
Pa Xurde Blanco, el maxistráu ta faciendo unes graves acusaciones “innecesaries, inxustes y sofitaes n’afirmaciones inciertes”. Dende l’Aconceyamientu de Xuristes del Asturianu afirmen que van recurrir la sentencia y exercer les aiciones procedentes escontra'l xuez Miguel Ángel Carbajo Domingo, "el mesmu qu'autorizó la construcción d'una casa a pocos metros de los monumentos prerrománicos del Narancu". 
 
El xurista comenta que'l maxistráu dixera nel so día que diba estimar la so alegación, en casu de que s'avalara la constitucionalidá de la Llei d’Usu, como a la fin sucedió. Esclarió amás, que ta faciendo de so l’argumentu del votu particular del Autu del Constitucional, “el votu perdedor que quier negar la condición de ciudadanu al funcionariu, cosa que los otros nueve votos almitieron”.
 
L’Autu del Constitucional establez que la Llei d’Usu diz que l’Alministración nun tien que contestar n’asturianu, pero tiene qu’aceptar toles comunicaciones nesta llingua, "dalgo qu’entiende cualquiera ensin nenguna dificultá, quitando a los que quieren dinamitar la Llei d'Usu y la Carta Europea de Les Llingües Rexonales o Minoritaries".
 
"El Principáu siempre respetó'l drechu a dirixise n'asturianu"
 
Según el Principáu, “per cuarta vegada”, escláriase que la forma alministrativa de proceder foi la correuta y non se conculcó nengún drechu. “L'actitú del Gobiernu foi siempre de respetu y cumplimientu de la Llei d'usu y promoción del bable, onde s'establez el drechu de los ciudadanos a dirixise n'asturianu a l'Alministración”, indiquen al traviés d’una nota de prensa.
 
Dende'l Gobiernu asturianu dicen llamentar qu'actitúes individuales como les de Xurde Blanco, “que recurrió inclusive a la descalificación de les persones que nel so día dictaron la instrucción interna d'usu del castellán nos escritos oficiales”, contribuyan a poner n'entredichu'l venir de l'Alministración y a xenerar tracamundiu ente la población asturiana.
 
El Principáu indica na nota de prensa que l'entamu d'esti conflictu remóntase a xunetu de 2006, cuando'l Direutor Xeneral de Rellaciones Institucionales y del Serviciu Xurídicu unvió una circular a tol personal del Serviciu Xurídicu dando instrucciones por que'l personal de la Direición, y específicamente los lletraos, utilicen la llingua castellana nos escritos oficiales que se redacten.