El Bloque refuga camudar el nome tradicional del estadiu de Siero

El Bloque de Siero vien d’amosar el so refugu a la intención del nuevu Alcalde, José Antonio Noval, de camudar el nome del estadiu de fútbol, “quitando’l topónimu tradicional”.

El nuevu executivu local, en manes del PP, quier cambiar de denominación del campu de fútbol d'El Bayu, y l'Alcalde va proponer rebautizar como Luis Miranda, nome d’un conocíu xugador y entrenador del Club Siero, que finó nun tráxicu accidente de circulación nel añu 2006, cuando s'inauguraron les instalaciones d'El Bayu.
 
Pa la organización local del Bloque por Asturies, pue que la memoria de Miranda mereza mención y que xugare papel importante na construcción del antiguu campu de fútbol, pero piden que nun s’use’l so nome “pa faer desapaecer el tradicional del sitiu”.
 
Dende’l Bloque amuesen la so oposición radical a que’l campu dexe de llamase El Bayu, “nun se mos ocurre que pueda haber manera meyor de llamar al sitiu que recoyer el topónimu tradicional”. La organización diz nun entender por qué se quier quitar al campu’l nome del sitiu onde s’asienta y que-y punxo la xente de Siero hai xeneraciones, “un nome coleutivu, que ye de toos y toes y que nun tien carga ideolóxica, nin partidista”.
 
“Ye curioso que sía’l Partíu Popular el que tea pensando nestos cambeos, ellos que n’otros sitios son ta poco daos a cambiar nomes asignaos a cais, parques y places, anque seyan de personaxes col únicu "méritu" de collaborar nun réxime dictatorial”, apunten pa finar.