Gabilondo pide que nun s'utilicen les llingües pa dividir y confrontar

El ministru de Educación pidió que nun s'utilicen les llingües como instrumentos de división política, capaces de xenerar discutinios "innecesarios" y clima de confrontación y esclusión.

Mientres la so intervención nel actu de celebración del Día de la Universidá Nacional d'Educación a Distancia (UNED), nel que presidió la investidura de cuatro doctores 'Honoris causa' en Filoloxía,  Ángel Gabilondo aseguró que'l principal enemigu del castellán y de les llingües polo xeneral ye la "estrechura de mires" de los que pretenden utilizales pa crear "aislamientu".
  
"Les llingües favorecen l'entornu social y faen crecer la conocencia, creando un espaciu real y efectivu de comunicación, d'incorporación d'identidaes y convivencia", destacó. Na so opinión, esta "función democratizadora" une a los españoles no que ye común penriba de les diferencies llingüístiques que los separen.
  
Nesti sen, alvirtió que nun va ser posible llograr la pretendida modernización del sistema educativu si ésti nun contempla una "sólida formación en llingües". "Enin elles nun ye posible nin el desarrollu personal de los ciudadanos nin el bienestar de la sociedá", señaló Gabilondo, que llamentó que los momentos menos fecundos na historia de la educación española "foron aquéllos nos que se desdexaron les llingües".
  
Asina, aseguró que nenguna de les propuestes que se faigan nel ámbitu de la enseñanza van olvidar que la gramática y la llingua ocupen un llugar "prioritariu". "Tenemos de veles como reflexu de la bayura del nuesu país y como una oportunidá, nunca como un problema", repitió.