De Lorenzo ufre l'apoyu del PP pa que la FSA sustituya a Areces

L'alcalde d'Uviéu, Gabino de Lorenzo, cargó contra'l presidente del Principáu y emplazó a la FSA a reemplazalu. Pa ello indicó que "van contar cola llealtá institucional del PP".

"La FSA tien que camudar a esta persona yá, porque esti home vive ausente de los problemes d'esta rexón", dixo De Lorenzo, qu'añadió que "esti Gobiernu ta faciendo agües per tolos llaos".
  
L'alcalde uvieín recordó que si hai unes selmanes consideraba un grave error de la FSA amortizar a Areces y buscar el so cambiu, güei paez-y un error qu'Areces siga siendo presidente del Gobiernu asturianu. Asina comparó al xefe del Executivu con un "boxeador que ta tocáu, que perdió la cortesía institucional y que practica un autismu políticu".
  
"Cuando un boxeador ta tocáu'l preparador físicu tien de parar el combate, sacalu del ring y llevalu pa casa. Equí'l preparador ye la FSA, creo que llegó la hora de cambiar a esti señor y yo, sin falar col mio partíu, puedo asegura-yos que cola llealtá del PP pa facer un cambiu d'esti tipu puen contar", dixo Gabino de Lorenzo, qu'añadió que "rescampla qu'hasta que lleguen les elecciones debe d'haber un gobiernu socialista, pero esti yá nun da mas de si".
  
El rexidor uvieín manifestábase asina mientres l'abertura de les piscines de Teatinos y al respeuto del actu d'inauguración del Archivu Históricu na antigua Cárcel modelu d'Uviéu celebráu ayeri. De Lorenzo, igual que fixo ayeri, volvió criticar la intervención d'Areces nel actu d'inauguración del Archivu y afirmó que "sintió pena", dao que'l presidente de "tolos asturianos aprovechó l'actu institucional pa fuxir de toa cortesía y insistir en vieyes firíes de fechos dramáticos asocedíos hai 75 años".
 
Vuelta d'Álvarez Cascos
  
Sobre la posible candidatura de Francisco Álvarez Cascos, De Lorenzo indicó que como yá dixo en munches ocasiones considera que sería "un magníficu candidatu y tien les puertes del PP abiertes pa encabezar la llista", anque añadió que ye él el que tien que tomar la decisión.
  
"Álvarez Cascos ye un gran políticu, los asturianos saben el llabor que fixo por Asturies, porque nun hai ministru que ficiere tanto en tan pocu tiempu", dixo.
 
Prerrománicu
 
L'alcalde indicó que l'actu d'ayeri "nun yera'l momentu pa faer propaganda" porque amás dixo qu'Areces basó los sos llogros en tres proyeutos, como son el Muséu Arqueolóxicu, que "ta zarráu sine día"; el Muséu de Belles Artes, "tornáu nun furacu" y el Prerrománicu "nel que nun fixeron absolutamente nada y tienen abandonáu dafechu".
  
Nesti sen De Lorenzo mostró unes semeyes recientes pa dar cuenta del estáu "total d'abandonu" nel qu'aseguró tán les "xoyes del prerrománicu". "Nun ficieron nada, el Plan del que falen ye otru cuentín", dixo.