Chiapas pide al Parllamentu que se pronuncie pola violencia mexicana

Representantes de comunidaes de Chiapas y del Centru de Drechos Humanos Frai Bartolomé de Las Casas pidieron la solidaridá del Parllamentu énte un "estáu d'esceición".

Jorge Armando Gómez, del Centro Frai Bartolomé, Antonio Guitérrez, de la comunidá de Las Abejas, d'Acteal (na que tuvo llugar la matanza de 45 persones en 1997) y Domingo Pérez Álvaro, del Ejido de San Sabastián de Bachajón, caltuvieron güei un conceyu cola presidenta de la Xunta Xeneral del Principáu, María Jesús Álvarez. Enantes del alcuentru, realizaron declaraciones a los medios de comunicación.
  
Gómez afirmó qu'en México hai una "regresión en materia de drechos humanos, en llugar d'avanzar en sentíu progresivu". "El Gobiernu mexicanu ta aplicando polítiques de seguridá que tán afectando a la población, ta militarizándose y ta xenerándose un estáu d'esceición de facto. Traxo munches muertes, perdes de cabeces de families. Nun lo podemos permitir", comentó.
  
Por ello pretendía "platicar un poco la situación de Chiapas, pa buscar la solidaridá como pueblos y autoridaes, puesto que'l respetu a los derechos humanos tócamos tanto a ciudadanos como gobernantes". Asina, entendió que "como gobiernu hai que recordar que la esixencia de derechos humanos tócamos polo xeneral a toos". "Al pidir la solidaridá ye pidir que'l Gobiernu asturianu mande la so palabra y les sos considerances al Gobiernu mexicanu, de manera qu'ente ciudadanos, organizaciones y gobiernos mos solidaricemos pa qu'haya un verdaderu cumplimientu de los drechos humanos", añadió'l representante chiapanecu.
    
Pa ello, llegó acompañáu de los sos dos compañeros. Recordó que nel casu de la matanza de la Comunidá d'Acteal, la masacre "cometióla'l Gobiernu federal, y hasta a la fecha sigue impune". Naquella época, l'executivu d'aquel país "basóse nos grupos paramilitares pero nunca s'indagó sobre los autores materiales, anque poco a poco foi saliendo la verdá", matizó. Recordó nesti sen que "l'añu pasáu'l gobiernu de EE.UU dio a conocer con documentos públicos la esistencia d'una estratexa de contrainsurxencia xenerada pol Gobiernu mexicanu pa semar el terror nes comunidaes que se taben organizando".
  
D'otra parte, el Ejido de San Sebastián Bachajón representa un "tipu de tenencia de la tierra colectiva que se ta acabando, porque se ta intentando privatizar". "Cuando los pueblos tienen una manera de vida colectivista, tendría d'haber una lexislación pal desarrollu colectivu de los pueblos. Cada vez el modelu ye más individualista, les polítiques xeneren una resquiebra del texíu social y eso atenta contra los pueblos de Chiapas y polo xeneral de México", acabó.