Villaviciosa celebra n’asturianu’l Día Mundial del Teatru

Villaviciosa acueye l’estrenu de “La compañía de Xuan Saco Botardo echa la comedia ‘El criáu de dos amos’” a cargu de Nun Tris, la representación conmemora'l Día del Teatru.

Esta pieza, traducida al asturianu por Lluis Portal, que se basó na obra escrita en 1745 por Carlo Goldoni “Il Servitore di due padroni”. El dramaturgu venecianu ta consideráu ún de los padres de la comedia italiana, na que predominaba naquel tiempu la Comedia dell’Arte.
 
Según indiquen dende la Conceyalía de Cultura del conceyu maliayu, l’humor deriváu de les situaciones cómiques que se desarrollen na obra de Goldoni, l’adaptación de los personaxes y la peculiar forma dialectalizada de falar d’éstos, aseguren una prestosa velada con una de les meyores compañíes profesionales de teatru d’Asturies, Nun Tris.
 
La cita ye’l próximu sábadu 27 de marzu, a les 20 hores nel Teatru Riera de Villaviciosa, con entrada de baldre. La función ta organizada pol Área de Cultura del Conceyu de Villaviciosa, col sofitu de la Conseyería de Cultura y Turismu del Principáu d'Asturies.