Xulio Viejo: “Hai que salvar la minor na próxima revisión de planes”

Pa Xulio Viejo la nueva titulación de filoloxía supón una meyora, pero tamién un retu, yá que les titulaciones van analizase constantemente y si nun se cumplen los oxetivos puen quitala.

El profesor, ún de los mayores espertos de l’asturianística, faló de la nueva minor d’asturianu nes Xornaes ‘Llingua y Educación’, empobinaes por Suatea y celebraes nel Centru Municipal d’El Llanu esti pasáu fin de selmana.

L’aprobación d’esta mención d’asturianu foi motivu d’una crisis dientro de la Facultá de Filoloxía, que llevó a la dimisión de l'anterior Decana, Ana Cano, tres que se refugara la presencia del asturianu dientro de los estudios reglaos por una enmienda del profesor Félix Fernández de Castro. Meses depués, la Xunta de la Facultá aprobó la propuesta d'una minor d’asturianu de 48 creitos prsesentada pol decanu en funciones, José Antonio Martínez.
 
Según Xulio Viejo, tolos fechos que pasaron na Facultá de Filoloxía respuenden al dichu asturianu ”cuando nun hai panchón, toos riñen y toos tienen razón”. Pal filólogu, na Universidá asturiana nun hai un proyeutu común y caún tira pol so departamentu, como amosó'l fracasu de la maior d’asturianu, “foi un actu de castigu del departamentu de filoloxía inglesa, el de más pesu, que queríen mantener el status actual y como nun podíen facer una enmienda a la totalidá, cargaron contra l’asturianu”.
 
Con too, pa Viejo l’aprobación de la minor supón una meyora que va permitir un conocimientu afayadizu, “y amás la minor d’asturianu va apaecer nel títulu del llicenciáu, que será oficialmente, por exemplu, llicenciáu en filoloxía española con minor d’asturianu”. Sicasí, el profesor apunta que quiciabes fairíen falta dos asignatures, “una más de lliteratura, pa dixebrar ente lliteratura clásica y moderna, y otru nivel de llingua”. El plan d’estudios contempla seis asignatures d’estudiu de les característiques del propiu idioma, una d'historia de la llingua, onde se darán les claves de la sociollingüística y una última de lliteratura.
 
Xulio Viejo tien enfotu en que l’Axencia Nacional d’Evaluación de la Calidá y l’Acreitación (ANECA) nun ponga problemes a la titulación d’asturianu, “pel momentu recibieron tola documentación y nun punxeron nenguna oxeción, esperemos que nun pongan nengún problema nel últimu momentu, cuando nun se puea facer nada”.
 
Estes titulaciones nueves entraran en vigor en 2010-2011, “anque’l minor entamará a estudiase nel segundu cursu, nel 2011-2012”. Xulio Viejo apuntó que tolos estudios van analizase añu a añu, “si nun se cumplen los oxetivos de matriculación puen quitase en cualesquier momentu, el gran retu ye salvar la minor nes revisiones de planes”.
 
Pa Viejo, el plan d’estudios de filoloxía va tener problemes de continuidá y na próxima revisión de módulos van perdese títulos, “minores, maiores y memamente titulaciones enteres”. “Amás, si consiguimos salvar la minor y quiten otres titulaciones vamos tocar a más, habrá más güecu y espaciu pa los estudios d’asturianu”, afirmó.
 
Pal filólogu, la entrada del asturianu nos estudios reglaos tamién pue suponer un reconocimientu pal profesoráu dientro de la Universidá, “anguaño nun tenemos departamentu propiu, tamos repartíos ente filoloxía románica y española, nun somos una entidá alministrativa propia”.
 
Ensin presencia n'infantil
 
Enantes de Xulio Viejo, foi’l profesor de Ciencies de la Educación y académicu, González Riaño, l’encargáu de presentar la mención d’asturianu en Maxisteriu. Unos estudios que van permitir la formación d’enseñantes en tolos niveles menos n’infantil.
 
“Nun esiste mención d’asturianu nel currículu d’infantil nin nos estudios de los futuros enseñantes d’infantil, frañen l’asturianu nel primer contautu cola educación y a curtiu plazu esto nun se va iguar”, apuntó’l profesor.
 
Pa Riaño, que l’asturianu tuviere como llingua vehicular d’otres materies, sería posible anguaño si la propia Escuela de Maxisteriu entamara cursos de postgrau o’l Principáu estableciera procesos p’asegurar la formación del profesoráu.
 
L’académicu adelantó que cuando se ponga en marcha la mención d’asturianu van facer un fuerte trabayu pa divulgala, “yá que ye la más perxudicada, l’asturianu ye la única opción que nun tien oposiciones.