Pablo Fernández: “Ye pernecesaria la unidá del asturianismu”

Pablo Fernández (Lluanco, 1969), ye Espertu en Mediación y Conflictos, Llicenciáu en Teoloxía, amás de Conceyal en Gozón y Voceru nacional del Bloque por Asturies.

Dicía la so organización va meses que los oxetivos del pautu de gobiernu taben cumpliéndose, señalando ente ellos la paralización de la construcción de la incineradora de Serín. ¿Camienta anguaño’l Bloque qu’esos oxetivos siguen cumpliéndose?
 
Los oxetivos fundamentales siguen cumpliéndose, unos oxetivos que nos motivaron a facer un pautu con fuercies nes que discrepamos en munchos aspectos. Pero creemos que la situación política d’Asturies merez esfuerciu y responsabilidá.
 
Sicasí, dende la FSA nun dexen de falar de la necesidá de la incineradora y de Sama-Velilla
 
La incineradora nun se va aprobar dientro del Gobiernu. Nós vamos apostar por una llei de xestión de residuos, con una serie de midíes establecíes xerárquicamente por viabilidá, onde l’últimu puntu será la incineración, nun podemos saltanos tolo anterior.
 
¿Nun paez que la FSA quier tensar el pautu nel últimu momentu, a un añu de les eleiciones, pa perxudicar a los sos socios de gobiernu?
 
Ye la sensación qu’a vegaes tenemos, lo que ye bastante irresponsable por parte de la FSA. Nós debémonos al pautu qu’hai y esto ye un exerciciu d’honestidá onde caúna de les fuercies tien qu’acotase a lo ellí alcordao.
 
Areces dicía va un mes en Madrid que n’Asturies el nacionalismu nun tien futuru, ¿tien sentíu tar nun gobiernu que nun conoz a los partíos que lu formen?
 
Areces conoz perfeutamente la ideoloxía del Bloque y lo que representa. Cuando diz estes coses fuera d’Asturies obedez a una imaxe que quier dar, forma parte del so cinismu. Esto indica que ye un personaxe políticu que ta agotáu, prueba ye que nel so propiu partíu tán buscando relevu.
 
¿Pero cómo s’entiende esa postura del Bloque de criticar a los miembros del executivu, apoyando al empar al gobiernu del que formen parte?
 
Nós sofitamos el pautu de gobiernu y criticamos tolo que sal d’esi pautu y de los nuestros principios. Tenemos un discursu na oposición y nel gobiernu, pero manteniéndolo. Nun podemos callar cuando’l Presidente fala de la llinia Sama-Velilla o la incineradora.
 
Izquierda Unida, na valoración del pautu de gobiernu, dixo va delles selmanes que víen cumplíos los oxetivos en política llingüística roblaos, ¿ye tamién esa la opinión del Bloque?
 
Ye que nel pautu de gobiernu nun hai nengún oxetivu que se cumpliere al 100%, lóxicu porque tovía nun finó la llexislatura. Tán dándose pasos como la toponimia o l’órganu traductor, esperemos que d’equí al final puean cumplise.
 
De cara a les eleiciones de 2011, nel casu de repetise la mesma representación de fuercies dientro del Parllamentu, ¿qué papel diba xugar la oficialidá dientro d’un posible nuevu pautu col PSOE?
 
Yo prefiero centrame nesta llexislatura y no que queda, que nun ye facil. Na llexislatura que vien hai un tema importante que ye la reforma del Estatutu, qu’anguaño ta parada. Pa min, según lo que planteguen dende’l PSOE y el PP, quieren facer un ‘retroestatutu’, porque sería peor del qu’hai. Nel procesu de reforma tendremos que falar de drechos sociales y llingüísticos, habrá que filar fino colos partíos que s’oponen a que se recueyan estos drechos.
 
¿Qué opinión tien de la llabor de Consuelo Vega na Direición Xeneral de Política Llingüística?
 
Falé personalmente con ella y dióme una impresión bona, una persona preocupada pola llingua y que diba facer tolo que pudiera pol idioma. Pero llueu hai coses que nun m’encaxen, paezme incomprensible que nun salga falando n’asturianu nos medios de comunicación. Llámame muncho l’atención la so postura col tema de la constitucionalidá de la Llei d’Usu, diciendo que los asturianos queríen la so llingua, pero non les imposiciones. Esa rellación ye inaceptable, representa la estratexa de los que tán a la escontra del asturianu. Estes pallabres nun tán acordies col cargu que representa.
 
Va pa dos meses Roberto Colunga recoyía l’acta como diputáu del BA, el primeru del so partíu, ¿qué balance fai del so llabor hasta’l momentu?
 
Lleva mui poco tiempu pero la valoración ye positiva. Anguaño’l Parllamentu ta más en sintonía cola realidá, hai una voz que representa al asturianismu d’esquierdes, amás falando na propia llingua. Dalgo que yá ye una novedá porque naide falaba asturianu dientro de la Xunta Xeneral. Amás d’ello, ta desendolcando un trabayu de recibir a toles persones que lu soliciten, ye una valoración perpositiva.
 
Hai un videu que circula pela rede, onde pue vese a Roberto Colunga na comisión de cultura del Parllamentu falando de Pepe El Ferreiro, y el so asturianu nun ye precisamente bono
 
Ye como’l castellán o cualesquier otra llingua, hai diferentes graos al falar. Yo nun voi criticar eso cuando tovía nun tenemos nin la oficialidá, nun vamos metenos nuna griesca nesti sentíu. Roberto Colunga fala asturianu, pudo utilizar un nivel más académicu, sí. Pero nun hai qu’entrar nesi tema, el tien un compromisu, usó y va usar l’asturianu dientro de la Xunta Xeneral.
 
Nel pasáu congresu d’UNA, usté mesmu dicía que l’asturianismu tenía qu’entamar a fixase no que lo unía, dexando a un llau les sigles, ¿tamos más cerca de la unidá del asturianismu políticu?
 
L’asturianismu ta nun procesu de redefinición, venimos d’una etapa de xuntures y dixebres. Na próxima llexislatura tamos xugándonos l’Estatutu y la oficialidá, eso fuercia a les organizaciones a facer un replantegamientu d’estratexa y ser práuticos pa sintonizar lo más posible cola realidá social. Esta redefinición dase nun contestu de bipartidismu perfuerte, con un espaciu alternativu, onde tal Bloque con IU-Los Verdes. Esti espaciu tien unes polítiques fundamentales; trabayu dignu, accesu a la vivienda, defensa del mediu ambiente y drechos sociales ya identitarios. En base a esi programa tienen qu’aconceyase toes eses fuercies del asturianismu, porque ye pernecesariu.
 
¿Y esi espaciu alternativu tien que venir de la mano d’IU?
 
Non, nós falamos siempre de programes, nun de sigles. Lo importante ye defender esi programa del que falaba enantes, un proyeutu de país al que tol que se quiera sumar va ser bienllegáu, ye hora de sumar.
 
Entós, ¿el Bloque taría dispuestu a dexar IU pa dir a unes elecciones con UNA?
 
Nun voi debatir sobre les sigles, yo quiero debatir sobre les idees, sumar pa llevar a cabu eses idees. Si nos metemos nel terrén de les sigles tamos repitiendo la historia de siempre; yo con estos nun voi, pero voi con estos otros. Hai qu’iguar un programa políticu, ¿tamos d’alcuerdu?, alantre, vamos sumar fuercies y entrar nel Parllamentu con más fuercia de la que tenemos agora. Eso ye lo que necesita Asturies y los ciudadanos, necesitamos facer una política alternativa al bipartidismu, pa ello ye necesaria la suma. Amás hai que tener en cuenta que’l PSOE podría necesitar la nuesa fuercia, y cuando pautamos con él consiguimos que les polítiques neolliberales que taben faciendo entamaren a escorar a la esquierda, lo que nos da más fuercia pa siguir esta estratexa.
 
¿Y que papel xuega’l PAS dientro de la xuntura del asturianismu d’esquierdes?
 
Ye lo que digo, nun ye un tema de sigles. ¿Esi partíu subscribiría esos exes políticos?. Si lo fai tien espaciu, pero habría qu’entruga-yos a ellos. Esti ye un espaciu d’esquierdes, asturianistes, verde y feminista. Ehí ye onde tenemos qu’encontranos tolos partíos que defendemos esto.
 
Nes últimes xornaes, los trabayadores de la RTPA tán convocando xornaes de fuelga y denunciando la situación del Ente públicu ensin que nengún partíu dixera nada hasta’l momentu, ¿son conocedores d’esta situación?
 
Roberto Colunga yá aconceyó colos trabayadores y vamos tratar el tema dientro del Parllamentu, mediáticamente tamién vamos posicionanos. Ye un tema de trabayadores, por supuestu que nos preocupa.