Universitarios denuncien la precarización del emplegu na Unión

La Coordinadora d'Asamblees d'Estudiantes fixo ayeri una 'performance reivindicativa' per Uviéu pa denunciar "l'estáu de sitiu nel que s'atopaba la ciudá" pola conferencia europea.

Los estudiantes quixeron asina denunciar la Conferencia sobre Desplazamientu de Trabayadores y Drechos Llaborales, que se cellebró ayeri y el miércoles dientro de la presidencia española de la UE.
  
Col lema 'Alerta Roxa pola nuevu pandemia de Gripe Porcina n'Uviéu', la Uviéu Medical Society (OMS) alertaba irónicamente "de la llegada del riesgu de contaxu ante una virulenta cepa del gripe porcina, trayida a Uviéu pol Ministru Corbacho, los representantes gubernamentales europeos y los representantes de la CEOE". Denunciaron con ello "la mercantilización de la enseñanza, dirixendo la so orientación puramente a los beneficios empresariales; la precarización de les condiciones de trabayu, con aspectos tales como la flexibilización del despidu o la infección por ERE y ETT". Señalaron tamién "l'aumentu de la desigualdaes nel sistema fiscal, aumentando impuestos  y tases a trabayadores y estudiantes, mientres s'amenorguen los impuestos de sociedaes capitalistes".
  
Los asistentes al actu percorrieron la cai Uría y axacentes n'Uviéu. Nél, "dellos ministros porcinos, con cargos como 'Ministru d'Evasiones Fiscales', 'Ministru de Dineru Público pa los Bancos', 'Ministru de Pufos, Puestinos y Perres' o 'Ministru de SGAE y Artistes Progres', llanzaron glayíos a los viandantes como 'Una llimosna, que namás ye pa caviar', 'Una ayuda, que cola crisis nun me llega pa la gasolina del yate', 'Xubilación a los 70, que los Bancos muerren de fame'. Mientres, otru grupu de "mélicos y espertos en salú pública intentaba aislar a los ministros y pidía a los ciudadanos d'Uviéu, a los que-yos daben cartafueyos informativos, que se movilizaren pa frenar esta nueva epidemia porcina", esplicó l'Asamblea.