UNA pide responsabilidaes sobre la 'carrera profesional'

Faustino Zapico señaló que la non almisión a trámite del recursu de casación, amuesa la “chambonada” que fixo'l Principáu y encamienta a asumir responsabilidaes.

Dende UNA consideren que nun se puen facer más oyíos sordos a los tribunales, “qu'una vegada tres otra, declararen la illegalidá de la carrera profesional plantegada pol Gobiernu asturianu". Pal voceru d'UNA, a día de güei naide nel Gobiernu asumió la mínima responsabilidá, "al contrario dedicárense a atacar a los sindicatos y organizaciones como UNA, que denunciaren énte los tribunales esti modelu de carrera profesional”.
 
Pa Faustino Zapico tanto'l señor Rabanal como la señora Migoya tán dafechu desllexitimaos pa siguir exerciendo les sos funciones, "darréu qu'apostaren pola llegalidá de la norma frente a la sentencia del TSXA y falaren de la perda del complementu yá pagáu a los funcionarios y de negalu a los que nun s'axuntaren a la carrera profesional, puntos que vuelven desmentise nel autu del Supremu, lo que s'amiesta a un númberu creciente de sentencies de distintos tribunales nel mesmu sen”.
 
Pa finar, Faustino Zapico reseñó que “lo más esmolecedor ye l'intentu non disimuláu del gobiernu asturianu por controlar políticamente los funcionarios per aciu d'un modelu de carrera illegal, a lo que los tribunales contestaren xurídicamente y UNA va siguir contestando social y políticamente”.