Consuelo Vega rescampla’l valir social de la cultura n’asturianu

“L’asturianu va vali-yos a los escolinos como una llave pa esfrutar y valorar la rica creación musical, lliteraria o teatral que s'espresa nesta llingua”, apuntó Consuelo Vega.

Asina se manifestó Consuelo Vega güei nel Teatru Maripeña de La Felguera, onde asitió a la representación de ‘Xulia’, de la compañía de teatru Margen. Representación que cuntó cola asistencia de más de 150 alumnos de los Institutos Santa Bárbara y Cuenca del Nalón.
 
Esta actividá enmárcase na Axenda Didáctico-Escolar 2009-2010 qu'entama la Conseyería de Cultura y Turismu cola collaboración de la Conseyería d'Educación, p'averar la creación cultural n'asturianu a la población moza. La Direutora Xeneral de Política Llingüística dixo qu’estes actividaes quieren sofitar el llabor del profesoráu n’asturianu y amosar a los escolinos que l’asturianu ye daqué más qu’una asignatura.
 
Un garapiellu d’actos que cunten con un presupuestu de 120.000 euros, pa una programación de 124 actuaciones, adaptaes a les distintes edaes del públicu y que llega nesta edición a 194 centros d'Asturies (142 de primaria y 52 de secundaria).
 
La ufierta incluye un total de 23 actividaes musicales, lliteraries y teatrales; 10 d'elles tán pensaes que l’alumnáu se familiarice col panorama musical de la mano de persones relevantes de la nuesa actualidá musical, como Mestura, Xentiquina, Xuacu Amieva, Anabel Santiago, Chus Pedro y Gabino Antuña, Diego Pangua, Xosé Antón Fernández (Ambás), Lisardo Prieto, Florentina Cuadriello cola collaboración de les Pandereteres de Fitoria, Mezá, Toli Morilla y Xune Elipe (Dixebra).
 
Tocantes a les actividaes rellacionaes cola lliteratura, propónense un total de cinco, que van analizar la actualidá poética, el cómic y la lliteratura infantil y xuvenil. Van tar dirixíes polos escritores Chechu García, Iris Díaz Trancho, Marisa López Diz y Vicente García Oliva.
 
Complementen la programación de l’Axenda les artes escéniques, con un total d'ocho actividaes y la participación d'Asturmitomanía, Higiénico Papel, Milio’l del Nido, Quiquilimón, Teatru Kumen, Yheppa, Eladio de Pablo y Teatru Margen. Les actividaes van finar a mediaos de xunu.