"Muyeres d'escañu y cartera brinden pola llicencia pa matar"

|

L'Arzobispu calificó d'esperpentu que "muyeres d'escañu y cartera brinden pola llicencia pa matar", según espresó na so carta pola celebración el 25 de marzu de la Xornada pola Vida.

"Triste semeya la de les brindantes y cuantos les apoyaron, alegrándose por tan macabros trofeos de caza onde les pieces de cacería son recién nacíos a los qu'atayaron el nacimientu", dixo, anque nun especificó a qu'imaxe se refería.

Na misiva recoyida por Europa Press, Sanz señala que la nueva llei ye una "increíble sentencia de muerte" y pidió a los católicos que se llenen "de pacífica fortaleza pa nun dar por cumplida la batalla contra la mayor contradicción de la nuesa época, nel equí y l'agora, cola nueva llei del albuertu".
  
"Hai que defender la vida del non nacíu defendiendo la vida de la madre, como defendemos igualmente la del que nació y sigue el so cursu con mil dificultaes de tou tipu, o la vida del que llegó por edá o enfermedá a la so fase terminal", añade.
  
Coles mesmes, calca en que "matar al neñu dientro d'una muyer que lu concibió, ye sentenciar de muerte a la mesma madre como elles mesmes testifiquen". "Nun lo saben los que nun quieren sentir realmente a la comunidá científica ante'l datu biolóxicu del entamu del ser humanu, los que constrúin con ideoloxía d'holocaustu una filosofía y una antropoloxía que nun tien rigor d'argumentu, los que cola escusa de defender unos pretendíos derechos de la muyer pretenden sacar importantes réditos políticos y económicos", apunta.
  
A lo último, Sanz Montes pidió tar "con amor humanu y cristianu" cerca de les muyeres xestantes, "ayudar de toles maneres posibles antes, demientres y dempués de la nacencia de los sos fíos; cerca d'estes criatures llamaes a la vida".
 

Contador Estadistiques