El Principáu estudia redactar una llei autonómica en materia d'incendios

El conseyeru de Mediu Rural y Pesca, Aurelio Martín, indicó que'l Principáu ta plantegándose la redacción d'un decretu o llei en materia de prevención d'indendios, asemeyáu al gallegu.

En rueda prensa, xuntu a la conseyera de Presidencia, Xusticia y Igualdá, María José Ramos, Martín esclaró que pel momentu'l so departamentu ta estudiando la distinta llexislación qu'esiste al respeuto n'España y n'otros países y precisó que son conscientes de que queda un añu por qu'acabe la presente lexislatura. "Sería un trabayu que dexaríamos fechu pal próximu Gobiernu", apuntó.

El titular de Mediu Rural adelantó que la nueva normativa trataría aspectos como les distancies de les plantaciones con respeuto a les viviendes o núcleos de población.
  
Ramos y Martín aconceyaron ayeri pa realizar un siguimientu de la Estratexa Integral de Prevención y Llucha contra Incendios Forestales n'Asturies 2009-2010, qu'aprobó en Conseyu de Gobiernu n'avientu del añu pasáu.
  
Según esplicó Ramos, el documentu recueye cuatro llinies d'actuación centraes na estinción, la investigación, la educación y la prevención, a lo que se destinaron l'añu pasáu 13,6 millones d'euros.
 
Medios materiales y humanos
  
La conseyera valoró amás les nueves tecnoloxíes implantaes pola entidá Bomberes d'Asturies, ente les que destacó'l Sistema d'Información Xeográfica (Gisba), una base de datos históricos de quemes pa "aprender sobre'l comportamientu del fueu" y la implantación de llocalizadores en vehículos y persones que permiten avisar al Serviciu d'Emerxencies del 112-Asturies. Recordó amás que Bomberos d'Asturies cuenta na actualidá con tres helicópteros, diez Parques de Bomberos, 48 autobombas y cerca de 80 vehículos.
  
Na so intervención refirióse amás al llabor de les Brigaes d'Investigación d'Incendios Forestales del Principáu d'Asturies (Bripas), que dará a conocer el so trabayu nes próximes selmanes pente medies de un informe nel que collabora'l fiscal de Mediu Ambiente del Principáu, Joaquín de la Riva.
  
A xuiciu de Ramos, Asturies cuenta con una situación "óptima" de parques y medios. Anunció amás qu'a los recursos actuales va sumase llueu un nuevu parque en Casu, nel entornu del Parque Natural de Redes, y otru en Somiedu, que nun tará acabáu p'antes del fin de la lexislatura.
  
Dientro del programa de Prevención, qu'axunta un total de 27 midíes, Martín destacó la puesta en marcha d'un estudiu dirixíu a ellaborar una estratexa pal emplegu de la biomasa residual de los aprovechamientos madereros de los montes. Al so xuiciu, la iniciativa permite prevenir los fueos y revalorizar los espacios forestales.