El TSXA refuga tramitar el recursu contra la carrera profesional

Según informa’l Conseyu por otra Fundación Pública, el Supremu vien de refugar l’almisión del recursu de cansación contra la sentencia qu’anulaba la carrera profesional.

Según informen, l'Altu Tribunal afita qu’a la sentencia nun se-y debió dar recursu, por referise a un actu alministrativu en materia de personal que nun lu tien: “la convocatoria qu'obligaba a los funcionarios a aceutar unes valoraciones profesionales desconocíes, feches pela alministración al so petite, o sinón quedar fuera y nun cobrar”.
 
“Esta resolución del Tribunal Supremu dexa albentestate la última de la llarga riestra de mentires espardíes dende l'alministración asturiana al rodiu del asuntu de la falsa ‘carrera profesional’, ye dicir, la de qu’obligaba a devolver les perres a los que les cobraron. D'ehí que los interesaos la caltengan tapecida”, indiquen.
 
Asina, confírmase que la sentencia del TSXA sólo anulaba la resolución de convocatoria, pero non l'alcuerdu previu del Conseyu de Gobiernu, que ye la norma qu'obligaba a pagar el complementu retributivu a tolos trabayadores con cinco años d´antigüedá, ensin falta de solicitú previa, “y que nenguna cantidá teníen que devolver los trabayadores que yá lo cobraren porque la vixencia d'esi alcuerdu nun taba en discutiniu, nin podía ser afeutada pol determín que tomara'l Tribunal Supremu”.
 
Tamién apunten qu’agora queden n´evidencia les prieses pa llegalizar la convocatoria valtiada pela Xusticia, “ente medies d’una vergoñosa llei, nun se debíen al deséu de torgar la devolución de lo pagao, sinón al propósitu d´impidir el cobru retroactivu a los trabayadores que nun quixeron roblar un cheque en blancu pa que’l Gobiernu Areces pudiere, a caprichu, dar a unos funcionarios sí y a otros non y, al cabu, facer clientelismu coles nómines”.
 
Según el Conceyu por Otra Función Pública, la propia Sala de lo Contencioso–Alministrativo sal tamién bien percutida por ufiertar la interposición d’un recursu, el de casación, improcedente. Amás, “énte lo que yá s’evidencia como una gran maniobra de manipulación de la opinión pública asturiana”, reiteren el pidimientu de dimisión de los conseyeros direutamente responsables d´esta burlla, el Sr. Rabanal y la Sra Migoya.