UNA culpa a Martín de que la vivienda baxara un “risible” 0,5%

El voceru de Vivienda d'UNA, Daniel Fernández, acusa a Noemí Martín d'invertir dineru público pa caltener de manera artificial el preciu de la vivienda, con una baxada que consideren “risible”.

Dende UNA denuncien “la política de subvenciones anubiertes a constructores y promotores, que la Conseyería de Vivienda vien faciendo a lo llargo de tol añu 2009, con un únicu resultáu que foi convertir a Asturies na tercer Comunidá Autónoma onde menos baxó'l preciu de la vivienda, acordies col INE, con un descensu risible del 0,5%”.
 
Según Daniel Fernández, cuando tolos datos indiquen que'l sector inmobiliariu va entamar a recuperase, n’Asturies los precios de la vivienda nun sufrieren l'axuste deriváu del pinchazu de la burbuya inmobiliaria, “asina los precios, respective del 2007, cuando se ven los primeros nicios de la crisis inmobiliaria, amenorgaron un 0,186%”
 
Según la organización nacionalista, Noemí Martín tien qu'esplicar a la ciudadanía “por qué se fixeron alcuerdos colos promotores y constructores para llibra-yos del stock de viviendes y de la mesma los precios de la vivienda nun sufrieren un descensu bultable”. Lo que pa UNA supón que los ciudadanos tuvieron que pagar la xuba de los precios de la vivienda.
 
Daniel Fernández quixo denunciar que “l'actitú de la Conseyera de Vivienda estropió descomanadamente a los ciudadanos, que se ven obligaos a pagar unos precios bien superiores pol so llar de los qu’habríen de pagar” y sicasí “los constructores y promotores que practicaren polítiques abusives de precios, foron premiaos por Noemí Martin con ayudes pa caltener el valor del so stock de viviendes”.