Suatea diz que la ufierta de places docentes ye “impresentable”

Suatea camienta que la ufierta d’emplegu dexa “in albis” a miles d’interinos y nuevos titulaos. Del mesmu mou, apunten que la dómina dorada de la que faló Riopedre nun ye tal.

El Conseyeru d'Educación, “de verdaderu oficiu ‘sparring’ del gobiernu asturianu”, indiquen dende’l sindicatu, dixo que ye inevitable que la crisis acabe notándose na enseñanza pública, anque esto ye un problema menor porque hasta agora atopábamos nuna “dómina dorada” de la educación.
 
Dende la organización educativa apunten que sigue sosprendiendo la sinvergoncería ya hipocresía qu'esbardien, “cómo manipulen, mienten y ofenden ensin el menor pudor”.
 
Pa Suatea, la “impresentable” ufierta de places para oposiciones de secundaria dexa “in albis” a miles d’interinos o nueves titulaos qu'aspiraben a entrar nel cuerpu de secundaria y que foron calteníos na incertidumbre de nun saber siquier si diba haber convocatoria n'Asturies o diben tener que dir buscase los garbanzos a otra comunidá autónoma, “agora, por desgracia, toos, sacantes los de cinco especialidaes, van tenelo que faer”.
 
El sindicatu indica qu’naquelles nes que si hai convocatoria ésta ye más baxa de lo que sería necesariu, “nun s'avera a les necesidaes reales teniendo en cuenta les xubilaciones y pue suponer más que nada un inconveniente, yá que muncha xente que lleva años trabayando ve amenazada la so posibilidá si pola causa que seya nun llogra una nota abondo alta”.
 
Pa Suatea, la “dómina dorada” de la que falaba Riopedre ye “una dómina de cobre, como esa a la qu'él mesmu diz que vamos llegar, pero cubierta por una gruesa, potente, gordísima capa de cardenillu, tanto que nin se ve lo qu'hai debaxo y tan tóxica que nun sabemos cómo vamos acabar, porque lo que ye xubilaos en curtiu plazu, tal que tán les coses, tarrecemos que non”.