Fai! reivindica los drechos de la muyer con delles performances

La organización Fai! salió a les cais d'Uviéu y Xixón pa engalanar seis estatues con mensaxes qu'afondaben na necesidá de superar les situaciones de desigualdá machista.

Asina, aprovechando la temática espeyada nes estatues, representábense comportamientos machistes a cargu de militantes de Fai! demientres s'espardíen cientos de panfletos desplicativos sobre la llucha antipatriarcal pola igualdá de drechos sociales pa muyeres y homes.
 
En Xixón escoyéronse les obres de "la madre del Emigrante" -con un gran símbolu feminista nel brazu-, "l'emperador Augusto" -esplumadera en mano- y "l’eloxiu del horizonte", onde s'instalaron cartelos nos que se podía lleer, en cada casu, "nun tamos lloques, namás somos feministes", "vini, vi y ficiéronme la cena" o "esti retrete vas llimpialu tu, King Kong".
 
D'otra banda, n'Uviéu les intervenciones reivindicatives fueron nes estatues de "el torero", "el culu" y "la maternidá de Botero", onde se fixeron representaciones con militantes antroxaos de la organización que calteníen comportamientos machistes. Les estatues taben engalanaes nesta ocasión con con cartelos nos que se lleía "el machu español querémoslu n'estincíon", "si nun te presta'l mio culu mírame a la cara" o "si nun criare sola a les nueses fíes y fíos yo tamién podría vivir".
 
De la mesma manera, yeren espardíos panfletos con un testu col que Fai! apuntaba que’l 8 de marzu taba marcáu pola discriminación tresversal de la sociedá d’anguaño pa coles muyeres y polos discursos institucionales y autocomplacientes de los gobiernos de turnu.
 
Apuntando que n’Asturies, la situación de la muyer sigue siendo humildante en toles estayes de la sociedá. “La dignidá de les muyeres sigue siendo violada nel día a día de les televisiones y otros medios de comunicación que na so mayor parte namás nos tienen por maniquíes y oxetos domésticos y sexuales”, del mesmu mou que “sigue ensin tenese en cuenta y poné-y remediu al réxime d’esclavitú no que cinca al llabor caseru y, nel so casu, a la educación de les fíes/os, lo que fai de les muyeres trabayadores ensin retribución nin xubilación (nin siquiera a los 67) nin vacaciones pa toa una vida”, señalaben.
 
Nel casu de les muyeres qu’acceden al mercáu llaboral la situación nun ye muncho meyor pa la organización, “nesti contestu neolliberal agresivu pa coles/os trabayadores, les muyeres siempre tienen les de perder y equí nun podemos dexar de llau a les nueses compañeres inmigrantes, que son la pata de bancu más feble”.
 
Fai! camienta que nel 2010 les muyeres siguen ensin ser verdaderamente dueñes del so cuerpu, “nun sólo no qu’a la vergoñosa violencia machista, que considera a les muyeres como dalgo más de la so propiedá, se refier, los sectores reaccionarios de la ilesia siguen aneciando en meter el cazu na llibertá de les persones obligándonos a tragar cola so hipócrita y rancia moral cristiana”, afirmen.
 
Fai! recuerda que nun hai drechos sociales pa miles de muyeres en tol mundu, “nin siquiera una migayina de llibertá pa protestar pola situación vergoñosa énte la que los gobiernos occidentales abocanen y miren pa otru llau, al tiempu que siguen permitiendo la inxusticia”.
 
Videu de les aiciones de Fai!