Más de 600 persones piden en Facebook la F1 n’asturianu

El grupu ‘Pa que la TPA dea la Fórmula 1 n'asturianu (qu'en castellán’ yá ta La Sexta)’ axunta en cuatro díes a más de 650 persones qu’esixen siguir les carreres n'asturianu.

La TPA entamó a tresmitir la Fórmula 1, faciendo emisión simultanea con La Sexta, al igual que pasa cola lliga de fútbol española, pel momentu les dos faen la tresmisión en castellán. Agora, esti grupu de Facebook pide que la televisión asturiana faiga’l direuto nel idioma propiu del país, yá que “quien nun quiera va tener La Sexta”.
 
Carrera más siguida dende 2008
 
El G.P. Bahrein anotó’l pasáu domingu en tol Estáu un 45.1% al traviés de LaSexta, onde hubo 4.957.000 aficionaos pendientes del debut de Fernando Alonso en Ferrari. Foi la carrera más vista en LaSexta y la más siguida en cualesquier cadena dende payares de 2008, cuando'l G.P. de Brasil axunto 6.808.000 siguidores con un 43%.
 
Na TPA l’audiencia foi de 25.6% y 65.000, asitiándose perbaxo de la canal estatal nel nuesu territoriu, 46.5%, casi un puntu y mediu más que la media estatal. Namás la televisión catalana superó a LaSexta, axuntando a un 34.1% y 667.000 espectadores. Mientres que la televisión valenciana foi la que menos audiencia tuvo cola Formula 1, 10.7% y 114.000 espectadores en Canal 9.