Gaona diz que nos Picos d'Europa hai que garantizar xestión y unidá

El direutor xeneral de Biodiversidá y Paisaxe dixo que'l modelu que s'adopte pal trespasu de competencies tien de garantizar "la xestión integrada del mesmu y la unidá ambiental".

José Félix García Gaona manifestábase asina en declaraciones a Europa Press un día enantes del conceyu que tien llugar güei en Valladolid, nel que se va tratar el borrador de los estatutos pa l'asunción conxunta per parte de les comunidaes de Castiella y Lleón, Cantabria y el Principáu d'Asturies de les competencies del Parque Nacional Picos d'Europa.

El direutor de Biodiversidá indicó qu'esiste voluntá d'acuerdu pal trespasu de competencies y aseguró que toles "dificultaes puen vencese al traviés del diálogu y l'alderique". De fechu aseguró que yá se dieron "pasos importantes" pa dichu acuerdu, como'l conveniu soscritu na xunta de presidentes de les tres comunidaes autónomes implicaes, Asturies, Castiella y Lleón y Cantabria.
  
"Como siempre hai dificultaes, pero puen vencese, y los temes más importantes yá se trabayaron", dixo Gaona, qu'añadió que seyan ún o más los modelos que se pongan sobre la mesa'l Principáu va proponer alzar el mesmu a la consulta del Estáu.