Cándido y Morala piden a Xusticia qu'esclare al xuez los sos llímites

Los sindicalistes, treslladaron güei al Ministeriu de Xusticia'l so pidimientu pa que medie nel conflictu de competencies creáu ente'l poder xudicial y l'Executivu, al "escedese de funciones".

Juan Manuel Martínez Morala y Cándido González Carnero 'Cándido', foron condenaos pol estrozu d'una videocámara de vixilancia mientres una de les movilizaciones de Naval Xixón, y agora, según ellos, el maxistráu Lino Rubio “escedese” na interpretación del indultu que-yos concedió'l Conseyu de Ministros.
  
Nesti sen, soliciten que'l Ministeriu adopte les midíes y acciones pertinentes pa que l'indultu parcial s'aplique lliteralmente. Asina consta na carta unviada a Xusticia recoyida por Europa Press.
  
L'indultu reduz nun añu la pena privativa de llibertá, de tres a dos, y oblígalos a pagar la indemnización al Conceyu pola videocámara, dalgo que yá fixo una tercer persona por ellos. D'otra manera, refuguen que se-yos faiga abonar la multa de 2.160 euros que sigue exixendo'l xuez, y pola que'l xulgáu intenta embargar les sos cuentes.
  
Los dos sindicalistes recurren al Ministeriu una vez agotada la vía xudicial, tres refugar l'Audiencia Provincial d'Asturies el so recursu contra l'abonu de la multa. L'Audiencia, nel so autu, considera qu'al nun mentase la multa nel indultu dictáu pol Conseyu de Ministros, significa que nun tán lliberaos del so abonu.