De Lorenzo lleva al Plenu la capitalidá cultural d'Uviéu

L'alcalde d'Uviéu rexistró una propuesta pa qu'Uviéu seya Capital Europea de la Cultura. Mientres qu'UNA acusa a los políticos de nun tar "al altor de les sos responsabilidaes".

Según consta nel escritu del primer edil, la participación nel concursu de Ciudá Europea de la Cultura pal 2016 convocáu pol Parlamentu Européu y el Conseyu de la Unión Europea "ufierta una gran oportunidá pa poner en valor los nuesos activos culturales tanto nel procesu de selección como, casu de salir, mientres l'exerciciu d'esi prestixosu títulu".
  
De Lorenzo señala amás que va incorporar a la so candidatura a los conceyos del entornu que quieran participar na mesma. "El primer oxetivu de la nuesa candidatura va ser llograr l'apoyu del conxuntu de la sociedá uvieina y de les instituciones y asociaciones representatives de la mesma", manifiesta.
  
Recuerda qu'Uviéu ye una ciudá con una "llarga y intensa" traxectoria cultural que la estrema nel ámbitu nacional y "hasta nel  internacional". La candidatura d'Uviéu va "abrise al conxuntu d'Asturies, que va integrar a los conceyos qu'asina lo deseen, una candidatura que va procurar sumar al conxuntu de la sociedá uvieina a esta iniciativa", según consta na propuesta.

UNA llamenta la perda "d'una oportunidá perdida"

UNA llamenta la perda de la oportunidá que diba suponer la capitalidá europea de la cultura. Ignaciu Llope, afirmó que la clas política nun ta al altor de les sos responsabilidaes.
 
Pa UNA la capitalidá europea yera una oportunidá pa “poner a Asturies nel mapa cultural européu y aprovechar l'esfuerciu pa dar a conocer la nuesa tradición pa valorizar el nuesu padremuñu, folclore, cultura, llingua y la nuesa historia”.

El voceru de cultura d’UNA, Inaciu Llope, quixo destacar tamién que la capitalidá europea foi amás un elementu dinamizador económicu d'otres zones como Liverpool o la Cuenca del Ruhr, “colo qu'amás d'un perinteresante altavoz cultural, perdimos una posibilidá d'avanzar escontra un nuevu modelu económicu pa esti país”.
 
Ignaciu Llope quixo tresmitir el malestar polo que consideró “una incapacidá histórica de la clas política asturiana pa desenvolver proyeutu pensando n'Asturies, y non nel localismu y partidismos más propios d'una dómina caciquil y provinciana que los políticos del PP y PSOE-IX nun son quien a dexar atrás” y llamentó “la rueda de descalificaciones na que se va a convertir la retirada de la candidatura, lo que tendría que ser un proyeutu colectivu de toa Asturies que reforzare la nuesa imaxe esteriormente y énte nós mesmos”.
 
Dende UNA camienten que “la clas política asturiana nun ta al altor de les sos responsabilidaes y el fracasu nel que se convirtió esta candidatura namás ye una amuesa más” concluyó Llope.