Roberto Holgado Iglesias, (Candás, 1973) ye Técnicu Superior en Xestión y Organización de los Recursos Naturales y ta acabantes de ser reelixíu Secretariu d’Organización d’UNA.

¿Qué valoración fai del Congresu d’UNA que se celebró n’Uviéu’l pasáu fin de selmana?
 
La valoración que facemos ye mui positiva tanto pol discutiniu internu al rodiu de la ponencia política que foi aprobada por práctica unanimidá, como pola oportunidá que tuvimos d´alcontranos, nel pieslle del congresu, con organizaciones polítiques y sociales coles que compartimos tantos principios políticos y programáticos. Esti congresu sirviónos amás pa siguir afitando les rellaciones esteriores con organizaciones como Aralar, Chunta Aragonesista o l'Alianza Llibre Europea.

Nel Congresu falóse de construir l’espaciu políticu asturianu, una alternativa a les fuercies representaes na Xunta Xeneral, ¿cómo va ser esi procesu pa construir esa alternativa y enanchar UNA?
 
UNA apostó nesti congresu pola creación d'un Espaciu Políticu Asturianu, y agora lo que queda ye desarrollar  esta cuestión en conxunto con otres organizaciones, coleutivos y persones. Vamos entamar a falar yá con otres fuercies polítiques. Cuál va ser el camín ye dalgo que tendrá que tratase col restu d'organizaciones que tengan interés por abrir esti procesu, nun queremos ser nosotros los que lu diseñemos. Si entamamos a falar d'un proyeutu común nun mos paez de recibu decidir nós el cómo, ónde y de qué manera tien qu'entamar a  desendolcase. En principiu lo que sí va pidir UNA ye que'l procesu entame yá y de manera discreta, creemos que la tresmisión en direuto de les negociaciones pue condicionar el resultáu final de manera negativa. Les esperiencies que siempre hubo nestos procesos evidenciaron munches veces l'intentu de les organizaciones polítiques por capitalizar o rentabilizar mediáticamente eses negociaciones, y eso nun pue pasar agora. Creemos sinceramente nesti procesu de creación d'un Espaciu Políticu Asturianu, nun ye dalgo táctico, nin queremos patrimonializalu nin podemos crear frustración y desilusión. Poro, actuaremos ensin buscar nenguna rentabilidá mediática. La única rentabilidá que tien qu'haber equí ye  p'Asturies si al final algamamos l'oxetivu. Pero esta mesma selmana n'aconceyándose la nueva Executiva, ún de los sos llabores va ser entamar una ronda de contactos.

Dende’l Bloque y dende’l PAS dixeron que yera’l tiempu de dexar al llau les rocees y trabayar por un proyeutu común, ¿tamos más cerca de la xuntura del asturianismu políticu?
 
Dende UNA valoramos mui positivamente les pallabres de Pablo Fernández nes que manifestó l'apueste del Bloque por un nuevu proyeutu p'Asturies qu'ilusione a la sociedá asturiana. Estes y otres pallabres foren mui coincidentes colos nuesos plantegamientos. Prestaríanos creyer, y creemos que son sinceres, yá que si partimos d'estes coincidencies tan fundamentales quier dicise qu'hai una mínima base pa entamar a falar. De toes maneres sabemos que vamos atopanos con torgues y estorbises asina que lo meyor sedría ser prudentes ensin dexar d'ilusionase. Dalgo que se siente nel ampliu movimientu asturianista, que nós llamamos na ponencia política  l'Espaciu Referencial Asturianu, ye que se necesita ilusionar a esti movimientu y a la sociedá en xeneral, asina qu'UNA quier apostar por un proyeutu que ruempa'l panorama políticu asturianu, qu'ilusione y mos ponga na Xunta Xeneral y nos conceyos con una alternativa política propia.  Queremos aldericar conxuntamente col Bloque sobre la táctica y estratexa que tien que siguir l’asturianismu políticu d'equí p'alantre. Hasta agora col Bloque hubo una estratexa distinta pol so apueste pola coalición con IU. Hai que ver si les estratexes pueden ser coincidentes d'equí p'alantre.
 
¿Qué papel xuega’l PAS, un partíu asturianista de centru, dientro del proyeutu de la esquierda asturianista?
 
El papel del PAS nesti procesu creo que depende más d'ellos que del restu d'organizaciones. El PAS tien un alcuerdu organizativu estable con URAS, una organización que recientemente dixo que yeren un partíu políticu de centru y rexonalista con unos oxetivos que nun coinciden con UNA, organización a la calificó como nacionalista excluyente. Per otru llau, la so torga histórica a la hora de consensuar un cabezaleru pa les elecciones paez que pue facer difícil de mano la posibilidá d'alcuerdu. Sicasí, valoramos mui positivamente les pallabres de Sixto Cortina nel congresu llamando a buscar lo que nos xunta. Lo que tenemos claro ye que col PAS vamos falar y vamos esplorar les coincidencies porque lo que se trata ye de sumar y asina lo mandó la militancia na ponencia política aprobada. El nuesu proyeutu aspira a iguar una alternativa na que s'axunte'l nacionalismu asturianu, la izquierda non sucursalista y l'ecoloxismu políticu y esi alcuerdu tien de ser ampliu pa que la xente d'esos ámbitos tea cómodo xente anque nun coincida al 100% colos nuesos oxetivos.
 
¿Y la xente más asturianista d’Izquierda Unida, como Valledor?
 
UNA apuesta por xuntar nun proyeutu común a toles persones qu'entienden a Asturies como suxetu políticu, que tienen una conceición d'Asturies como país, o que sienten que les rempuestes a la situación d'Asturies han partir dende la esquierda verde. Nun cabe dubia que Valledor ye  un activu políticu que, al colar del gobiernu coincide colos principios anteriores, pero primero de nada queremos respetar l'afiliación política que sigue teniendo. UNA tien les puertes abiertes a sumar, asina que nun concebiríamos si se diere'l casu pesllar les puertes a naide qu'asuma estos principios.
 
¿Y los militantes d’Andecha Astur que nun tán dientro de la coalición UNA?
 
Andecha Astur ta envuelta nun procesu xudicial dende va tiempu que nun acaba de resolvese. UNA nun pue nin quier metese nos sos problemes internos,  y nin UNA nin naide podría pesllar anque quixera un alcuerdu con una parte d'esa organización que fale en nome de toa ella. Nun ye solo una cuestión política ye un tema llegal y hai precedentes que recomienden muncha prudencia poles repercusiones que pue tener hasta nun procesu eleutoral. Otra cuestión ye que se resolviere'l conflictu xudicial, porque ehí l'escenariu sedría distintu. 
 
Anguaño munches de les polítiques qu'afeutan al nuesu país decídense n'Europa, ¿Cómo s'alticula esto dende UNA?
 
Ye cierto, pa UNA ye perimportante afitar rellaciones cola Alianza Llibre Europea, y tamos trabayando nesti enfotu, de fechu Nelly Maes, presidenta d’Alianza Llibre Europea unviónos unes pallabres pal congresu d´UNA . Hai que recordar que’l grupu políticu de Los Verdes –ALE nel parlamentu Européu cuenta con 55 parlamentarios .  
 
¿Qué sería lo que más destacaría del trabayu d’UNA nestos dos años d’esistencia?
 
Los más importante pa nós foi demostrar que ye posible trabayar y xuntar  nun  proyeutu común a persones que per munchos años fixeron política n'organizaciones distintes con táctiques distintes.Eso amuesa que ye posible facer  proyeutos comunes con otres organizaciones y persones. UNA ta afitándose  nel panorama políticu asturianu con una receptividá mui notable que se ve na medría constante de militancia y estensión del proyeutu en conceyos. Definimos nestos dos años un proyeutu políticu que ye asumible pa una parte perimportante de la sociedá asturiana. Eso queda bien espeyao na posibilidá de pesllar alcuerdos con otres organizaciones polítiques d'ámbitu municipal que coinciden con nós na rempuesta política que debemos dar non sólo nos conceyos sinón tamién n'Asturies en xeneral. Lo más reseñable ye la nuesa contribución a crear l'alternativa qu'Asturies necesita y neso siguimos.
 
La sociedá sigue teniendo la visión del asturianismu como “los de la llingua”, ¿Cómo va trabayar pa iguar esto, pa que conozan tol discursu del so partíu?
 
Nun coincido dafechu na apreciación, ye cierto que per munchos años esa visualización del asturianismu políticu foi asina, de toes maneres eso va cambiando mui rápidamente, si entrugues a la xente de Carreño paezme difícil que puedan afirmar que la UNA ye'l partíu de los del bable, porque a lo llargo d'estos años UNA, non sólo en Carreño sinón en toa Asturies,  garramos posición en munchos temes aparte de la oficialidá del asturianu. Por exemplu en dellos de los conceyos nos que trabayamos UNA destaca pola defensa radical del mediu ambiente y el desarrollu sostenible. De toes maneres  ta claro que pa UNA la oficialidá del asturianu ye una cuestión de drechos fundamentales y eso nun ye negociable.
 
¿Qué resultáu esperen algamar en 2011?
 
Esperamos qu'UNA tenga representación na Xunta Xeneral y en munchos conceyos asturianos. Pa nós la entrada nes instituciones ye una cuestión perimportante porque creemos que dende les instituciones, anque non solo nin muncho menos, ye posible cambiar la realidá asturiana. Ye por ello qu'UNA quier sumar fuercies con otres organizaciones y persones, que mos dean la posibilidá d'amosar  qu'otra forma de facer política ye posible, tamién dende les instituciones.
 
¿Tienen pensao yá quién va ser el so candidatu nacional?, ¿cómo va ser el procesu pa escoyelu?, ¿y nos conceyos?
 
Lo qu'esperamos ye que nun tenga que ser sólo UNA la que decida quién van ser los nuesos candidatos. Eso va ser una cuestión qu'esperamos reflexonar con más organizaciones y persones. D'otru llau l’aumentu de militancia nos conceyos onde se ta faciendo trabayu, fai posible que dellos candidatos y candidates tean entovía por venir.