El Beltaine xeneró y declaró unos ingresos de más de 120.000 euros

El conceyal de Cultura del Conceyu d'Avilés, Román Antonio Álvarez, declaró que'l festival Beltaine "xeneró y declaró unos ingresos estramunicipales de más de 120.000 euros".

Nuna nota de prensa espublizada pol Conceyu, respuende a les acusaciones qu'esta mañana realizó la conceyala del PP, Carmen Vega, nes qu'afirmaba a Xuntanza, organizadora del Beltaine, de nun xustificar parte de los gastos.
  
Álvarez tacha les declaraciones de la conceyala popular de "onanismu mental o la defensa d'intereses particulares o, n'últimu términu y más probablemente, ambos factores combinaos". Califica como "babayaes" les valoraciones que fixo Vega sobre les cuentes d'un festival "que se xustificaron correchamente en primer instancia, cosa insólita hasta la fecha, y que cuenta, consiguientemente, con tolos informes técnicos preceptivos favorables, incluyíu'l d'intervención".
  
El conceyal de Cultura asegura que "esta señora sigue 'chau chau' atacando la honorabilidá de les persones, sin nenguna base nin argumentu ciertu y probáu. Tien la estúpida creyencia de pensar qu'una mentira repitida mil veces puea tornar en verdá y fai suya la fea estratexa política siguida pol so partíu d'echar calumnies qu'algo queda".
  
Amás, Álvarez critica que nun acuda a los actos culturales nin a l'audiencia oficial de "un programa como l'Innovate, con seis socios europeos de gran nivel, despreciando a estes delegaciones socies de la nuesa ciudá" y que s'atreva a salir calumniando y diciendo necedades, máxime cola que ta cayendo al so partíu nel área cultural cola decepción de don Gabino a la Candidatura a la Capitalidá Europea, de lo que, curiosamente, nun tien nada que dicir".