Areces garantiza voluntá d'acuerdu pa trespasar Picos d'Europa

El presidente del Principáu d'Asturies señaló qu'esiste voluntá d'acuerdu pal trespasu de competencies del Parque Natural de Picos d'Europa y aseguró que les "dificultaes puen vencese".

Álvarez Areces, qu'asistió güei a la xunta de la Mesa Estraordinaria del Comité de les Rexones en Valladolid, respondió asina a les declaraciones de la vicepresidenta primera de la Xunta de Castiella y Lleón y conseyera d'Agricultura, María Jesús Ruiz, que se quexó esta selmana de que'l Gobiernu asturianu ye'l que "menos ganes echa" pa consiguir la xestión y acusólu de caltener una posición "bien cómoda" na tresferencia.

El presidente asturianu, qu'apuntó "nun coincidir" col calificativu de 'cómodu' de Ruiz, manifestó que siempre esisten dificultaes cuando hai una negociación "con distintes situaciones de partida", pero repitió la voluntá p'algamar un acuerdu y refirióse como prueba d'ello al conveniu soscritu na xunta de presidentes de les trés comunidaes autónomes implicaes, Asturies, Castiella y Lleón y Cantabria.
  
"Como siempre hai dificultaes, pero puen superase, y los temes más importantes yá se trabayaron", espresó, al empar que confió en que les negociaciones sobre la xestión acaben esti añu.
  
Coles mesmes, aprovechó pa esclarar qu'a pesar de les dificultaes pola desigualdá de condiciones" nos territorios, particularmente pol tema de personal qu'al so xuiciu "afecta más" a Asturies, el Principáu ve'l parque como una "unidá ambiental.