El 70% de los trabayadores de TPA secunda la primer fuelga na canal

Según el comité d’empresa, la fuelga convocada en RTPA foi siguida pol 70% de los trabayadores convocaos. Mientres que dende la direición del Ente afirmen que foron 11 persones.

La fuelga taba convocada ente les 17.00 y les 21.00 d’ayeri, 11 de marzu, y según el comité d’empresa tuvo un siguimientu del 70% ente los trabayadores de la propia plantiya direuta de la RTPA convocaos, 14 persones de 20. Mientres qu’ensin cuntar los cargos de responsabilidá'l siguimientu foi d’un 95%, “100% si nun cuntamos los emplegaos temporales”.
 
El propiu Ente de comunicación d’Asturies, esclarió al traviés d’un comunicáu, que foron 11 los trabayadores que fixeron fuelga y que’l motivu del paru foi’l despidu d’un emplegáu “qu’incumplió de xeitu avezao'l so horariu”. Indicando, amás, que RTPA da trabayu a dalgo más de 600 persones.
 
El Comité d’Empreses afirma que nel comunicáu tán mintiendo yá que na TPA tán destruyendo trabayu, “nun se cubren les numberoses places de compañeros que marchen a otres empreses pa facer el mesmu trabayu meyor remunerao”.
 
Amás, indiquen que RTPA pue dar trabayu a 600 persones, “pero d’elles namás 100 tán arreyaes direutamente con TPA, de les que namás el 70 tán con contratu fixu, el restu son trabayadores precarios con contratos temporales y mal pagaos”.
 
Dende CSI-TPA denuncien un despliegue de seguridá nes instalaciones de la canal pública “desaxeráu” na xornada de fuelga. Amás del impedimentu a miembros del comité de fuelga de facer el so trabayu con normalidá, la restricción d’accesu a delles estayes, la entrada de la policía nel centru de trabayu, la manipulación de la noticia sobre la concentración nel informativu de TPA, y un comunicáu “escandalosu, corporativista y mentirosu al final del informativu, atentando contra’l drechu de defensa del despidu en mediu d’un procesu xudicial”.
 
Primer fuelga na historia de la RTPA