Esixen que se reconoza la pluralidá llingüística nel pautu educativu

|

Los grupos del PNV, BNG, ERC ya ICV anunciaron que nun firmaríen el testu del pautu d'educación pola necesidá de que se reconoza la pluralidá llingüística d'España.

Tres la reunión conxunta col ministru d'Educación, Ángel Gabilondo, p'axustar el documentu ellaboráu pol Gobiernu p'algamar el Pautu Social y Políticu pola Educación, tolos grupos aseguraron que "güei" nun roblaríen el testu porque, al so xuiciu, queden "munchos" aspeutos por consensuar.
  
El PNV, representáu pol diputáu Aitor Esteban, manifestó'l so "desconciertu" ante la xunta de güei nel Ministeriu d'Educación, que calificó de "caos", y porque esti testu non sólo tien que ser negociáu colos grupos, sinón tamién colos axentes "varios" del sistema educativu y les comunidaes autónomes. Coles mesmes, alvirtió que "lo que ye güei" el so grupu "nun lu roblaría" porque tovía queden cuestiones por concretar, como la reconocencia de les llingües cooficiales na enseñanza énte a la "fiebre del inglés".
  
"Ye insultante que nun se contemple de manera categórica nel documentu que l'Estáu español ye plurilingüe", recalcó'l voceru de los independentistes catalanes, Joan Tardá, pal que ensin un pautu "de llingües", ye "imposible" un pautu educativu. "Que nun cuenten colos republicanos si nun reconoz nel testu la enseñanza plurilingüe", sentenció. Na mesma llinia mostróse la vocera nacionalista de BNG, Olalla Fernández Dávila, que pidió'l "respetu" pola pluralidá llingüística y defendió la educación pública, igual que'l representante d'ICV Jordi Guillot.
  
Pel contrario, pa la vocera d'UPyD, Rosa Díez, l'Estáu tien que recuperar les competencies en materia educativa, defendió una llei de financiación de la enseñanza, un currículu laicu "dende'l puntu de vista ideolóxicu, relixosu y políticu" y la llibertá de la eleición llingüística, ente otres propuestes. "El pautu ye bien complexu y difícil, pero muncho más necesariu", manifestó la dirixente d'UPyD, que pidió al restu de los grupos "voluntá de país" pa llegar a un consensu.
 

Contador Estadistiques